Nûmayîşê Grevê Veyşanî ke 15ê Sibat ra tepya, girotxaneyanê Tirkîye de vera tecrîd, OHAL û îşkence destpa kerdbî, vizêr ser vengdayîşê KCK qedîyay. Girotxaneyan ra pîya, Grevê Veyşanî yê Strasbûrg zî ame qedênayen.
Girotxaneyanê Tirkîye de bi seyan tepişteyê sîyasî yê dawa PKK û PAJK, 15ê Sibat ra tepya destpa Grevê Veyşanî kerdbî. Weşîya bi desan tepişteyan zaf xirab bî û tepiştey bi talokeyê merdişî ra rî bi rî mendî. La rixmê nayî zî, hikûmet cayo ke veng bido waştiş û qîrayîşê tepişteyan, her ke şi vera tepişteyan de îşkence kerd xorî. Hemserokîya Konseya Rayverîn ê KCK, 18’ê Nîsane 2017’î de vengê qedînayîşê nûmayîşî da. KCK aşkere kerdbi ke, xoverdayîşê tepişteyan resya hedefê xo û waşt ke Grevê Veyşanî biqedîyo. Tepişteyan ser na vengdayîşî vizêr Grevê Veyşanî qedêna. Ser nameyê tepişteyan Denîz Kaya bi îzahateke raya pêroyîn rê ciresna ke înan Grevê Veyşanî qedêna. Herayîya îzahatî de wina vajîya:
Kevneşopîya xoverdayîşî ramena
“Kerdenê faşîs ke netîceyê polîtîkayanê faşîst ê hikumeta AKP de vejyay werte, bi îtîfaqê MHP giran bî. Hewl ame dayen ke krîterê ewilîn yê demokrasî û azadîye bîro çinkerdiş. Operasyonanê qirkerdişê sîyasî ra pîya tecrîd û binlinkerdişê heqan yê girotxaneyan xêlê bî giran. Ma tepişteyê dawa PKK û PAJK; kevneşopî (geleneg) û xeta xoverdayîşî yê Kemalan, Semayan û Sarayan ra yenê. Ma ti wext kerdenê faşîst û teslîmiyetî qebûl nêkerd, ma dê qebûl nêkerê zî. Kevneşopîya xoverdayîşî yê PKK zey vizêr, ewro zî pêrokîn zîndanan de dewam kena. Wa îtîfaqa faşîst ê AKP-MHP bizano; ma ê şoreşgerê ke seba Rayver û şarê xo, bi xoverdayîşî ver bi serkewtişî şinê.
‘Ma mînetarê şarê xo yê’
Sernî de Grevê Veyşanî yê Girotxaneyê Şakranî, ma nûmayîşê xo yê xoverdayîşî ke 15ê Sibatî de da destpakerdiş, ser vengdayîşê Hemserokîya Konseya Rayverîn ê KCK qedênenê. Ma pêrokîn şarê xo, quwetanê demokratîk û her kesê ke bi mesûlîyetî kewtî hereket û bî vengê ma, selamî kenê. Ma îtîfaqa qilêrîn ê AKP-MHP rê fina da bîn vanê; eke tecrîda ser Rayverê ma, operasyonê qirkerdişê sîyasî yê hemverê şarê ma û binlingkerdişê heqanê mordeman ê zindanan dewam bikerê, ma dê bi rengekê qewetir destpa nûmayîşanê pîlî bikerê. Sernî de Grevê Veyşanî yê bêdem û bêdorveger ê Şakranî ke roja 64. de yo, ma nûmayişê grevê veyşanî yê Girotxaneyanê Sîncan, Bolû, Trabzon, Tarsûs, Şakran û pêrokîn zindananê bîn, ser vengdayîşê KCK qedînenê. Ma pêrokîn embazanê xo yê ke grevî de bî selamî kenê. Ma fina da bîn vanê, ke ma mînetarê şarê xo yê.”
Heto bîn ra girotxaneyan ra dima, Grevê Veyşanî yê sûka Fransa Strasbûrg ver Konseyê Awrûpa zî bi îzahatekê çapemenî ame qedênayen.
NAVENDÊ XEBERAN