Ez wazena nuşteyê xo yê ewro bi meseleya “grevê veyşanî" dest pêbikera. Yeno zanayîş ke 15ê Temmuzî ra dima, her cayanê Tirkîya de her kesî hetê dewlete ra zaf zulm û zorî dî. Xeylek nêheqî bî û zaf zî tengûne vecîya. No proses o wext ra heta ewro ser şaranî Tirkîya de dewam keno.
Heto bîn ra no zulm û zorî tena teberî de dewam nêkeno, miyanê hepîsxaneyan de zî dest pêkerd û dewam keno. Ma heme zanê ke rewşa hepîsxaneyanê Tirkîya verî ra zaf hol nîyo. La 15ê Temmuzî ra dima ma eşkene vajê ke rewşa hepîsxaneyan, teberî ra zêdîyer xîrabino. Hêvêr saya tekoşînê tewkifkerdiyan de heme hepîskerdeyî heqanê xo yê huqûqî qezenc kerdibî.
15ê Temmuzî ra pey, dewlete bi behaneyê rewşa îstîsnayî (OHAL), heqê tewkifkerdiyan, destê înan ra girewt. Bi no sebebî tayê hepîsxaneyan de 15ê Sibatê ra tepya grevê veyşanî dest pêkerd. Grevê veyşanî hêvêre hepîsxaneya Sakranî de dest pêkerd. No hepîsxane de grevê veyşanî roja 59. de yo. Wesîye nê mahkûman zî kewte binê tehlûke.
Goreyê raporê platformanê huqûqe zî 21 hepîsxaneyî de 186 tewkifkerde yê sîyasî grevê veyşanî de yê. Sima zî zanane ke Tirkîya da hetê tewkifkerde ye sîyasîyan ra ge-ge grevê veyşanî virazîyayî bî. Goreya prosesan zî wastisê înan est bî. Nika zî wastise grevdaran esto û nê wastisî winayê: Ê yewin; wedaritisê tecridê ser Abdullah Ocalanî, ê diyîn; holbîyayisê şertanê hepisxaneyan û ê hirêyin; wedaritisê zordarî ye eskerî û siyasî. Mahkûman ney sartanê xo eskera kerd û kewtî grevê veyşanî. Semedê grevanê veyşanî hem partîya HDP hem zî partîya CHP wezaretê edaletî yê Tirkîya de kewtî îrtîbat labelê qet yew îzahat, yan zî yew vate nêvecîya. Wîna aseno ke venge wezaretê edaletî heta referandumî nêvecîyeno. Yanî hetê sîyasî ra grevanê veyşanî ser yew çare nêvîyeno. Şarê kurd zî sey her wext paştê grêvderan de yo. Na rîwal ra bajaranê Istanbol, Amed û Wanî de xeylek merdiman dest pê grevê veyşanî kerdî. La tersê ma na yo ke çend roje ra pey wesiyê nê grevdaran beno xirabin. Cunke zafê tewkifkerdîyan kewtî sînore mergî. Gereka ma zî veng bidê grevê veyşanî ra. Na mesele, seba ma kurdan meseleyêka zaf muhîm a.
Meseleya diyin; şima zî zanenî ke siba Tirkîya de weçînayîsê referandumî estê. Şarê ma ye kurd bajaranê Ewropa de reyanê xo da û reyanê Ewropa erşawîye Tirkîya. Çend hewte ya ca ver mi fikirîyayisê xo yê derheqê referandumî tiya de vat bî. Seba ma kurdan qezenckerdişê “Ya“, yan zî "Nê" de ferq çinîyo. Her di rewse de zî Tirkîya ver ba kurdan de yo. Reyna zî goreyê sîyasî û semedê asîtî gereka ma vajî "Nê". Tirkîya de xebatê "Nê" yî de hetê dewletî ra xeylek zorî vecîya, cûnke her çî deste dewlete de yo û dewlete zî semedo cuwîyayisê xo vano “Ya“. Na rîwal ra zî zafîyer xebatkaranî "Nê" bi behaneyanê dewlete xebatanê xo ra qedexe bî. Nê xebatkarî yan erzîyeyî nezarathane û yan zî erzîyayî hepisxaneyî.
Sey yew komedî ma eskenê vajê ke heme xebatkarê "Nê"yî hepîsxane de yê. Her sere sibê ajansan de xeberanê tepîşyayîşî vecîyenê. Mîyanê nê ortamî de vecîyayişê "Nê" zor o, la reyna zî ma gereka waharê reyanê xo û îradeya xo bivecîyê.