Hefteyê verên çalakîya nobeta azadî ke hetê yewna grubî ra ameynê girewtiş no hefte hetê gruba 5 kesan ê ke Zurîh ra ameyî dewr ame girewtiş. Nobeta azadî no hefte dekewno hefteyê 161’in. Gruba ke rojo yewşeme ra naşt nobeta azadî gênîy bal antîy ser Şorişa Rojawanî.
Ma şoriş silam kenîy
Endamêy grubî derheqê Şorişa Rojawanî ke serra xo ya hîrêyîn pey xo de verda de vat ke, no şoriş bîya hêvîya heme tevgerêy şorişger ya dinyayî wina berdewam kerdîy: “Ma Şorişa Rojawanî ke dagirkerîya pergalî ya Kurdistanî xira kerdo û semeda azadîya şaran ruhê xoverdayîşî veto werte silam kenîy.”
Çalakwanan ra Îsmîhan Ok vat ke: “Heta ke weşîya min dest bido ez do ti çalakî û têgêrayîşî ra tepa nêmana. Ez beşdarê greva veyşanî ya ke destpêkerdişê çalakîya Ocalanî rê azadî de bîy û 2 aşmîy dom kerdîy zî bîya. Serekê ma cenî azad kerda û mîyanê komelî de semeda cenî giranîyek dayo qezenckerdiş. Coka azadkerdişê Serekî deynê vîyê ma yo.”
Vindertiş heram o
Dilşah Sîncar ke endama dayîkêy aşitî ya û aye zî beşdarî greva veyşanî ke 2 aşmî domyayo bîya zî hestanê xo wina ard ziwan: “Seyî cenî ma azadîya Serek Ocalan, seyî azadîya xo, şarê kurd û Kurdistanî veynenîy. Na semed ra heta ke Ocalan azad bibo vindertiş ma rê heram o.”
Ruhê xoverdayişî
Endamanê grubî ra Eşref Ozbek zî derheqê çalakîyan de ard ziwan ke ez fikiryena ke do nobeta azadî erenî bi encam bibo û wina domna: “Cîyayîya tekoşîna ma ya 5 kesan tîya de aseno. Ma yewnan qet nas nêkenîy. Ma heme şaristana Zurîhî ra amey la cayanê cîya bi cîya ra. No çalakî ma ardîy têhet. Ma tîya de xerîbî nêancenîy, çimkî tekoşîn ma rê ruhê embaztî û xovrdayîş bander kerd. No sey kesêy ke Rojawanî de cuyenîy û ziwananê cîya cîya qalî kenîy la semeda rûmeta merdimantî heman hetî de ca genîy, maneno. Beno ke nobeta azadî demekê nêzd de bi encam nêbo la ez fikiryena ke no çalakî do erênî bi encam bibo. Ewropa de her kes Ocalan û kurdan bi no çalakîyan nas kerdîy û fikrê înan zî bi no hawa bedilyay.”
Azadîya ci azadîya ma
Çalakwanê bîn Mehmet Alî Koçak zî veng da heme kurdan ke cayo ke êy tede yî wa beşdarî çalakî û tekoşînan bibîy û wina vat: “Heta ke Serekê ma yesîr bo, ê ke xo ra vanîy ez kurda lazim o hetê wijdanî ra rehet nêbîy û bi asan nêşînbîy rakewîy. Lazim o her kes ca yo ke tede bi derfetanê xo beşdarê çalakîyan bibo. Azadîya Serekî azadîya ma yo û heta ke Serektî azad bibo kurdîy no waştişê xo de wayîrê biryar îy.”
Embazan rê wayîr
Endamê grubî ya Rojawanij Cemal Mamo zî vat ke, YE û DYA dirîtî kenîy û wina domna: “Ez çekûyêy ke hestanê xo pey bîyera ziwan nêvînena. Qalîkerdiş qîm nêkeno, wextê qalîkerdişî nîyo, eyro wextê girdkerdiş û wayîrvejîyayîşê çalakîyan o. Eyro senî ke şehîdê ma rûmeta ma yî se, embazêy ma ke zindanan de amey pirrkerdiş zî do bibîy rûmeta ma. Êy şehîd û erjêy ma ke cuyenî yî. Ez semeda wayîr vecyayîşî veng dana her kesî.
YE û DYA zî bi vatiş de paşte danîy kurdan, la pratîk de cîya têgêrenîy. Madem şima paşte danîy kurdan aye wext birêz Ocalan semeda çi zîndan de yo? Semeda çi PKK hîna lîsteya terorî de ya? Ger ke şima dirî nîyî aye wext lazim o verpersîyarîya ke keweno milê şima, şima bîyarî ca.”