Gülsüm Koç

Bêdanox, bêsuc tam 62 serrî û 8 asmî ceza dê Gülsüm Koç. Îtade beno eskera ke no hukumat û dewleta tirkî, nêverdanê domonê kurdî weşiya xo normal biramê.
Dewa Sêwaz de niyadîme!
Serokwezîrê tirkî Recep Tayyîp Erdoxanî warodayena dawa qomê xorê kerde bimbarek. Bi qerarê mehkemê tirkî qetilkarê alevîyan ceza ra xeleşayî.
Onca waxtê hukumatê AKP de Uğur Kaymaz ame kistene. Keşî 62 serrî ceza qetilkaran nêdê.
Ceylan Önkol bi jû rakete amê qetilkerdene, keşî 62 serrî ceza nêgurete.
28ê gaxana 2011 dewleta tirkî Roboskî de domonê kurdî tertele kerdî. Hata ewro fermanê tertelî kamî do, hona zelal nêbiyo. Na mavên ra hayê 14 asmî vêrdî ra, sermiyananê tirkî ra vengê nêvejîno.
Mehmet Ağar bi hezaran însanê kurdî û şoreşgerî kiştî, teyna 5 serrî ceza gurete. Hora nejdî de  “hepisxane” ra vejîno. Kilmek, qetilkarî Tirkiye de bêceza manenê, mordemê bêgunayî zî qeda û bela oncenê.
Mordemê ke kistena Hrant Dînk de rol kaykerd, her jûyê xo caye bî wayîrê maqamê berzî. Nî pêro waxtê hukumatê AKP de bî.
Onca gorê raporê Komela Heqanê Mordemî yê Tirkiye, 2002 ra hata asma hezîranê yê parî, 171 domonî amê qetilkerdene. Yanî waxtê hukumatê AKP de nî domonî amê kistene.
Hepisxanê Pozanti de domonanê kurdî rê sene heqeret û zulm bî, hona vîra ma dero.
Mesela Gülsüm Koç zî nî meselan ra jûy a. Adaleta tirkî belka seweta taye tirkan adalete ana, seweta kurdan zulm ana.
Werte de delîl çîno ke Gülsüm Koç kes kisto, ya zî kerdo dirvetin. Hama savci û hakîmê AKP kewtê qestê domonanê kurdan. Gülsüm Koç kamiya xorê wayîr vejiya, coka hakîmanê adaleta AKP honde ceza da ci.
Hakîm û savciyê AKP bi vatena danoxê nimiteyî (gizli tanik) ceza vornenê însanê kurdî ser. Danoxo nimite zî îcadê demê hukumatê AKP wo. Eke verva jûyî delîlî çînê bî, hakîmê AKP na delîlê bêbinge anê kar.