FADIL DONMA / HANNOVER
Seba wayîrvejyayîşê lehçeyê kirmanckî hewldayenê kirmancan benê vêşî. Bi no perspektîfî sûka Almanya Hannover de roja Yewşeme ‘Şewa muzîk û edebîyatî yê kirmanckîye’ virazîya. Şewe de derheqê rewşê kirmanckî de panel virazîya û herzewbîn hunermend Cemîl Qoçgîrî albumê xo yê newe "ZÂLAL" ke verîya çend aşman vejîya da silasnayen. Salona aktivîte de standî ronîyay, kitabe, kovare û CDyê kirmanckî amey rotiş.
‘Şewa Kirmanckîye’ ke hetê komela kultur yê Faust e.V. ame organîzekerdiş de 200 kesî tewr bî. Hunermend Cemîl Qoçgîrî ke şewe de vejya sehne, qalê rewşê kirmanckî kerd. Qoçgîrî vist vîrî ke kirmanckî lehçeyêke antîk o û seba eyî yeno maneya ziwanê muzîkî. Qoçgîrî albumê xo yê newe "ZÂLAL" dasilasnayîş û dîyar kerd ke pêrokîn kilamê albumî bi kirmanckî yê ke hetê şaîre Dogan Mûnzûroglû ameyê nuştiş.
Raştê asîmîlasyonî yeno
Aktivîte de şaîre Akman Gedîkî şîîre xo yê kirmanckî wendî. Herzewbîn şaîre Gokmen Sambûr û Necat Baysalî bi Kurmancî, Mahabad Allaîe zî bi Hewramanî ve Farsî şîîre wendî û raştê eleqeyêke gird amey.
Azad Can o ke kursê kirmanckî dano zî şewe de qisey kerd û hayr ant muhîmîya musayîşê ziwanî ser. Canî da zonayen ke lehçeyê kirmanckî ke hardê Mezopotamya de yeno qiseykerdiş raştê asîmîlasyonî yeno.
Qisey, wendişê şîîre, mesaj û muzîke ra dima Şewa Kirmanckîye saet 20:30 de qedîya.