Dersim de kî bi hezaran kesan bi slogana “Ma dê teqez serbikewê”  Newroza 2017î bimbarek kerd.

Dersim de bimbarekîna Newroz Meydanê Sey Riza de, bi slogana “Ma dê teqez serbikewê” virazîya. Bi hezaran kesê ke bi kincanê xo yê heremî tewrê bimbarekînî bî vengê ‘Nê’ berz kerdî. Gurekarê taşeron ke bi QHQ (KHK) karî ra amey eştiş zî bi dowîzanê “Ez karê xo û nanê xo wazena”, “Seba ameyoxî Nê’ bimbarekîna Newroz de cayê xo girewtî. 

Vinderdişê hurmetî ra dima mesajê Hemşaredaranê Dersim Mehmet Alî Bûl û Nûrhayat Altûn’î ke tepişteyê amê wenden. Mesaj de hina vajîya: “Newroz roja xoverdayîşî ya. Abîdeya xoverdayîşî ke bi Kawa destpa kerd û Amed de bî Mazlûm. Ma ke bi reyanê meşrû yê şima weçînîyay, bi sebebanê xeyrî meşrû wezîfe ra amey girewten. Ma hona ser wezîfeyê xo yê. Teyna şima besekenê ma wezîfe ra bicêrî. Têkoşîn hona nika dest ci kena. Serra bîn de ma dê pîya nê meydanan de Newroz bimbarek bikerî.” 


Adirê Newroz bi coş wekerdîya

Wendişê mesaj ra dima Parlementerê HDP yê Dersim Alîcan Onlu û Serokê Şaredarîya Mêzgir Tekîn Turker’î Adirê Newroz wekerdî. Peycoy temsîlkaran dest ci qiseyan kerdî û mesajê xo yê Newroze day. 

Endama DRM yê ESP Îlke Başak Baydar qisey kerd û Roşanê Newroz bimbarek kerd. Serokê Şaredarîya Mêzgir Tekîn Turker’î zî Newroza şarî bimbarek kerd, parlementer û hemşaredarê ke tepişteyê selamî kerd. Turker’î hayr ant referandûmî ser û va, ‘Referandûmî de ganî meterîsê ke amey qezenckerden bîrê seveknayen. Tekîn Turker’î vist vîrî ke ganî sena ’Nê’ hona jêde bîro gurenayen.

Azayê EMEP’î Mehmet Turkmen’î zî vist vîrî ke tarîx ra na het Dersim de zaf seferî virazîyay, la qet zaferî nêbî û aşkere kerd ke zey Sey Riza’yî tornê ci kî dê vilê xo çot nîkerê.  


‘Meydanan bêwayîr meverdê’

Parlementerê HDP yê sûk Alîcan Onlu ke bi kirmanckî qesey kerd û vatişanê Hemserokê HDP Selahattîn Demîrtaşî ke Newroza par yê Dersim de ard zone, “Eke ma bîrê tepiştiş, şima rê wesîyetê min o, meydanan bêwayîr meverdê” vist vîrî û bi hezaran kesê ke meydanî kerdî pirr hemşaredar û parlementeranê tepişteyî selamî kerd. 


Şima dê bi lanetê xo şirê

Onlu’yî vist vîrî ke ’38 de Hardê Derwêş de pêrokîn selahîyetî dîyay  Alpdogan’î û hina va: “Nika kî selahîyetî dîyenê walîyan. Ma xêlê Silo û Mistoyan dî, amey û şî. Kesî Alpdogan’î rê rehmet nêwend. La hemverê ci de Sey Riza û alwozê ci estbî. Kamca rê rehmet û dûa yenê wenden zelal o. Ma taqîpkarê Denîz, Mahîr, Zarîfe, Besê, Sakîne û Sîbelan ê. Bi sebebo ke şima aîdê naca nîye, çima bi tanq û topan fetelînê (geyrenê). Şima layiqê Mercan û Mûnzûrî nîye, şima dê bi lanetê xo şirê.“ 

Tewr peynî de pîyê Mûrat Gun o DHKC’yî ke 7ê Mijdare 2016î de Dere yê Çetî de weşîya xo kerd vinî Kemal Gun’î qesey kerd. Gun’î vist vîrî ke grevê veyşanî ke seweta girewtenê cenazeyanê domananê xo dest ci kerdî roja 27. der o. Kemal Gun’î aşkere kerd ke jew este bo kî, heta ke cenazeya domanê xo bigîrê, iyê dê xoverdayîşê xo bidomnê. 

Qiseyan ra dima hunermend Hivda Gokel vejya ser sehne û klamananê xo vate.  


 DÎHABER/DERSIM