Serranê ’90’î de dewleta tirk bi destê rêxistinanê çete yê zey JÎTEM û Hîzbûl-Kontra bi hezaran Kurdistanijan qetilkerd. Hewna zî ne estey ne zî mezeleyê nê kesan nêamey vînayen. Dewleta romî ya faşîst ke nêşa verniya hereketê serbestî yê Kurd bigîro, bi nê înfazanê bêsûal, bi nê qetlîaman waşt hometî bitersno û destegê ci yê serva hereketê serbestî bibirno. Bi ters û zorvajî tifing da des hezaran kesan û kerd qoricî. Yê ke verniya na zilm vejyay zî bî hedefê terorê dewlet. Rêxistinê terorîst JÎTEM û Hîzbûl-Kontra zey çeteyanê DAIŞ bi hezaran kesan remnay, înfaz kerd û peycoy kerd vinî. Ganî ganî merdiman tepirit bin erd. Zey kergan serreyê merdiman cikerd û ganê ci kerdî lete lete. Hezaran keye û dewê Kurdan veşnay, înan kerd goçber. No zilm tenya hendayî niyo, zewbîn zî çiyê ke nînê aqilê kesî ardî serr Kurdan. Nika zî taynê ci vejyenê pêrokîn nê qilêrîn-leyminîyê xo îtiraf kenê.
Nê cayan ra jew zî qezayê Şirnex Cizîre yo. Cizîre serranê ’89’î ra tepya verra zilm û zorvajiya dewlet dastpa serhewedayinan kerd. Wexto ke kesî nêşa behsê Kurdatî bikero, şarê Cizîrê vejyay meydanan û wayrê kamî, hard û ziwanê xo vejyay, zilmê dewlet ra vatî hendî beso. Ceniyê Kurd yê Cizîrê yê zey Berîvanan verniya tank-top û guleyanê dewlet vejyay û serrewedarnay, dêsê dewlet welişnay. Cok ra Cizîra Botan tim û tim hedefê dewleta faşîst de ya. Qûwetê tarî yê xorîn zî, dewlet bi xo zî bi serrano wazenê heyf bigîrê.  Çi ke toximê sifte yê xoserey Cizîra Botan de erziyay.
Xeylê wext ravêrniya, la zihnîyetê dewlet zey verî mend. Zey serranê ’90’yî nê rojanê peynî de zî fina-onca domon-qeçekê Kurd yê Cizîr hedefê polîsanê dewlet de yê. 27’ê Kanûn ra heta na het Cizîr de jewê ci genc şeş qeçikê Kurd amey qetilkerdin. Peynî de, 14’ê Çile de qeçeko 12 serre Nihat Kazanhan bi guleyê polîsan ame kişten. No înfaz raştê wexto ke mesajê Rayver Öcalan’î ya serva şarê Cizîr resya amê.
Cizîrê de qûwetê qilerîn fina ser kar de yê. Kam bibê wa bibê, dewleta paralel, ya zî dewleta xorîn, çormeyê siya ya zî çormeyê spî, çormeyê raşt, ya zî çormeyê çep, kam bibê wa bibê mesûlê nê qetlîaman hikûmeta AKP bi xo ya. Heta ke nê înfazan zelal nêkero, kiştoxan ceza nêkero sucdar hikûmet bi xo ya. Vatişê şahîdan provakasyon û sînyalê qetlîamî rafînenê ver çiman. Şahîdî vanê ke bi rojano Cizîr de wesayîtê eskerî yê bê plaqa geyrenê. Seatanê şan de kuçeyan de marşê mehter yenê wendin. Kes şeno persa ‘rixmê nê provakasyonan çima hikûmet tedbîr nêgirot’ bikero. La hikûmet bi xo nê qetlîman teşwîk kerdo. Jew keso ke qetilkerdinê Hrant Dink de nameyê ci ravêreno û derheqê ci de waştişê tepiştiş esto zey midurê polîs tayînê Cizîr biyo. Bado ke no midûrî Cizîr de destci kar kerd, nê hewldayinê qilêrînî zî bî vêşî. İmbazê Nîhat’î anê ziwan ke, wexto ke înan îşaretê haştî kerd polîsan zî bi tifingan hêrişê înan kerd.
Wezîrê karê zerî yê Tirkiye Efkan Ala zî wayrê polîsanê xo vejyeno û vano; polîsan hêriş nêkerd û ano ziwan ke Cizîr de her çî bin qontrolê qûwetanê dewlet de yo. La herkes zano ke Cizîr de teva bin qontrolê dewlet de niyo û cok ra dewlet no qezayî xo rê kena hedef. Ala cayo ke polîsan wezîfera bigîro înan rê çepik dano. Bi fermanê Efkan Ala Amed de veriya çend serran xeylê qeçekî amey kişten. Reîs-cûmhûrê na dewlet zî xo ra vano bikişê! Serva ke polîsî rehatî bikişê û ceza nêgîrê qanûn vejenê. Nika zî wa hikûmet nê cînayetan nêerzo çormeyanê bînî ser. Çiyo do bîno mihîm zî no yo ke, nê qûwetê tarî, teber de DAIŞ, zerre de Hizbûl-Kontra, Huda-Par hikûmet bi xo vistna hereket. Cok ra çiyê ke benê netîceyê polîtîkayanê şaş yê hikûmet de benê. E ke AKP nê plan û polîtîkayanê şaş de israr bikero, do sebrê şarê Kurd sînorî ravêrno.