HUSEYÎN HAZAR / STRASBOURG
Ewro serrgêra 18. ya Komploya Mîyanneteweyî ya. Kurdistanijî û dostê ci ke tewrê nûmayişê protestokerdişê serragêra Komployî yê Strasbûrg bî, vera komplogeran nêrazîbîyayişê xo damûsnay. Nûmayişkaran ardî zon ke eke Ocalan azad bibo encex o wext haştî zî nezdî bena. Welatijê Alman Herr Schmîdt’î ard ziwan ke o seba azadîya Kurdistan û Ocalanî dûa keno.
Nûmayişkaran ra Haci Oltan’î komplogeran lanet kerd û aşkere kerd ke no Komplo vera pêrokîn şarê kurd virazîyayo. Oltan’î da zonayen ke 18 serrî yo o her tim seba Rayberê xo Ocalanî meydanan de yê û va, ‘heta ke O azad bibo nûmayişê ma dê dewam bikerê.
Şehmûs Dîlok’î zî da zonayen ke o seba serbestîya Rayberê xo tewrê nûmayişî bîyo û dîyar kerd ke waştena bi mîlyonan kesan serbestîya eyî ya. Dîlok’î ard ziwan ke serbestîya Ocalanî serbestîya çehar leteyanê Kurdistanî ya û Komplo şermezar kerd.
Ocalan pawitoxê haştî yo
Welatijê Alman Herr Schmîdt ke tewrê nûmayiş bi zî da zonayen ke o verîya serrekê ser nameyê Merkezê Weşî yê Almanya (Gesundheitszentrum) şi bi Kobanê û wina va: “Bado ke mi însanê germ û qehreman yê Kobanê silasnay, kam ke mi rê persa ‘ti kotî ra yê’ keno, ez vana ‘ez Kobanêyij a’.” Herr Schmîdt’î pîyakarîya hikûmeta Merkel bi Erdogan’î rê nêrazîbîyayîş damûsna û aşkere kerd ke o seba azadîya Kurdistan û Ocalanî dûa keno.
Welatijê bîn yê Alman Norbert Keuken’î zî vist vîrî ke 18 serrî yo bê sûc Ocalanî girotxane de tepişenê. Keuken’î da zonayen ke Ocalan pawitoxê haştî yo û va, ‘eke Ocalan azad bibo encex o wext haştî zî nezdî bena. Seba azadîya eyî û haştî çi destê ma ra bîro, ma dê eyî bikerê.’
Heta azadîya eyî…
Bijar Narçîn ke nûmayişa rayşîyayişê derg yê Mannheîm ra heta Strasbourg de ca girewt zî dîyar kerd ke ê seba serbestîya Ocalanî 6 rojî meşîyay. Narçîn’î ard ziwan ke heta ke Ocalan azad bibo iyê dê nûmayiş de bê û va wa herkes nayî bizano. Narçîn’î gencanê kurd ra waşt ke hona vêşêr aktîf bibê û va, “Ya Rayverekê azad, ya hêç.”
Sadîye Yagiz zî Rayverê Şarê Kurd Ocalan’î ra pîya, gerîlayanê kurd, xoverdayoxanê zîndanî û Kurdistanijê ke têkoşîn kenê selamî kerd û va, ‘Wazeno wa Tirk bo, Ereb bo, Fransiz bo; çi beno wa bibo, yê ke Rojê ma tarî kenê wa înan rê lanet bo.
Ganî Ewropa bihesno
Nûmayişkar Cej Çîyayî zî quwetê ke bi Komployî Ocalanî teslîmê Tirkîye kerdî bi nefret şermezar kerd û nêrazîbîyayiş damûsna. Çîyayî va, ‘ewro birastî zî kurdî bi zonayişeke gird tîya de yê û serbestîya Rayverê xo wazenê. Çîyayî va ganî pêrokîn welatê Ewropa no vengî bihesno.
Kahraman Oltan’î zî ard ziwan ke emserr zî zey her serr ê bi venganê cîya seba serbestîya Rayverê Şarê Kurd ray şinê. Oltan’î aşkere kerd ke vînayişê hendayî însanan çîyekê zaf weş o û va, ‘heta ke Rayver Apo azad bibo ma dê her tim ser payan de bê.
Gencê kurd Fuad Koçer ke tewrê rayşîyayişê derg yê Mannheîm ra heta Strasbourg û mitîngê gird yê Strasbourg bi zî komplo rê nêrazîbîyayiş damûsna û kesê ke tewrê nûmayiş bî selamî kerdî.