Nika yew babet esto la yew nîvano. Ez wazena vajî. Yew tehluke û xeterîya zaf gird esta. Vakurê Kurdistanê ra hetê Ewropa ra zaf koçkerdiş esto. Ayê ke yenî koçkerdiş hema hema pêronê înan ciwanî.
No qey Kurd û Kurdistanê zaf yew xeter (taloke) o. Wexto ke yew kuçeyê Ewropa de gêreno, yew şino komelan, yew şino cayê qampanê penaberan, yew rastê ciwanê Bukarê Kurdistanê yeno. Ez zafê înanî ra yew bi yew qiseykena. Ez perskena şima senî ameyî? Kamî şima ardî? Cewabêk danî, fekê yewî akerdi maneno. Hema hema pêronê nê ciwanê kurd, AKP û dewleta tirk şirawena. AKP û dewleta tirk verê cû eynî çi ard serê Rojavayê Kurdistanê ser. Nika eynî kaykerdiş serê Vakurê Kurdistanê kenî. Wexto ke, Rojavayê Kurdistanê ra koçkerdiş bi. Mi zafe cayan de ser koçkerdişî qiseykerd. Mi çapemenî de ser koçkerdişî qiseykerd. Zorê tayînan şino. Ayê ke zorê înan şino vejîya werte ke, înan zî bira û wayê xo ardî. Nika ciwanê Rojavayê Kurdistanê kuçeyê Ewropa de beredaye beredaye gêrenî. Tayî înan kewtî rayîrê xirab. Gera ciwanê hina Rojavayê Kurdistanê de bimendenê û Kurdistan awanbikerdênê. Hemberê dagîrkere Tirk û çeteyê tirk verra DAÎŞ şer bikerdênê. La remayê ameyê Ewropa. Dewleta tirk bi rayîrê MÎT’î nê ciwanê ardî Ewropa. Nika eynî plan ser Vakurê Kurdistanê yena ramitiş.
Dewleta tirk pê rayîre eşkera ciwanê kurd rêxistin kena û şirawena Ewropa. Pêronê înan pê pasaportê tirk yenî. AKP û dewleta tirk, tore çeteyan rêxistin kerdî. Verê cû şinî mîyanê ciwanê kurdî de qiseykenî, vanî kam wazeno şiro Ewropa, ma eşkenî yardimê eyê bikeri. Hina yew bi yew ciwanê kurd tespît kenî, verê cû şirawenî Stanbol. Dima ra zî ser xebatkaranê qasidanê balyozxaneyan înan rê pasaportê ciya ciya hadre kenî. Pê hîrê rayîran înan şirawenî Ewropa.
1- Pê rayîre teyaran ciwana benî, Bosna Hersek, Xirvatîstan, Bulgarîstan, Romanya, Makedonya… Dima înan pê rayîra kaçaxî benî Macarîstan. Macarîstanê ra zî derbase Awusturya, Swîsre û Almanya kenî.
2-Rayîra diyîn zî pê otobusan înan şirawenî. Qey (seba) nayî ciwananê kurdî rê pasaport vejenî. Dima ra înan rê vîzeyê turîst hadre kenî. Sey turîst şirawenî Ewropa.
3-Rayîra hîrêyîn zî ser nameyê hunermend û bazirganan ciwanê kurdî ra pasaportê sexte hadrî kenî. Raşta raşt pê na rayîrî ciwanê kurd şirawenî Ewropa.
AKP û dewleta tirk pê nê planî hem Kurdistan veng (tal/tol) kena û ciwanan têkoşîn ra dûrî visnena, hem zî înan ra pereyan gêna. Serê yew ciwanî 6-7 hezar euro pereyan gêna. Gera HDP û DBP ser nê babetî bivindo. Zobî zî gera şarê kurd hemverê nê planî bivindo. Gureyê ciwanan ayê esil pawitişe Kurd û Kurdistanî yo. Zobî zî gera pêronê tore şebekeyê ke ciwanê ma şirawenî Awropa, pêronê ayê şebekeya kaçaxçîyan bêro eşkerakerdiş. No wezîfe yê sîyasetmedar û rojnamegeren o.