HDK-Ewropa ke 4ê Sibata 2017î de bi Kongreyekê Bruksel de ronîya destpa kampanya Nê’ kerd. Hemverfekê HDK-E Demîr Çelîk ke derheqê ronayişê HDK-E û aşkere kerd ke iyê dê bi mîlyonekê reyanê ‘Nê’ destek bidê.
Çelîk ke derheqê referandûmî de ANF rê qisey kerd da zonayen ke seba ke dînamîk û quwetanê demokratîk yê Ewropa bin platformekê ortex de rêxistin bikerê înan qerarê kongre girewto. Çelîk’î vist vîrî ke HDK-E projeyê Rayverê Şarê Kurd Abdullah Ocalanî yo û va no proje bi HDP ra weçînayîşanê 7ê Hezîranî de serkewt.
Demîr Çelîkî da zonayen ke ê wazenê ke no projeyê Ocalanî, çar leteyanê dinya de vila bikerê. Çelîkî aşkere kerd ke bi raya HDK-E êşkenê no projeyî bikerê hereketê global yê pêrokîn dinya. Hemverfekê HDK-E Demîr Çelîkî hayr ant qeraranê kongre ser û wina va: “8ê Adare Roja Cinîyanê Kedkar ê Dinya, 21ê Adare Newroz hu 1ê Gulane Roşanê Kedkaran de xebat û nûmayişê hera dê bîrê viraştiş.”
Do talokeyê girdî bîyaro
Çelîkî hayr ant referandûmî ser û vist vîrî ke destûreke newî ya bingeyîn ê zey qebulkerdişê destûra bingeyîn a dagirkerîya Kurdistan û Tirkîye hesibnenê û wina dewam kerd: “Na destûra bingeyîn ke 16’ê Nîsanî de pêşkeşê referandûmî bena, verîya her çî pawitişanê civarî rê nêbena cewab. Pêrokîn erkê qanûndayîşî, rayverî û yê mahkeme keno destê şexsekî. Herzewbîn rewşa faşîzan û dîktatorî, do talokeyê girdî bîyaro sereyê şarê ma. Cok ra ma wazenê Ewropa ra vengekê girdî vejerê.”
Dê seba ‘Nê’ bikewê hereket
Hemverfekê HDK-E Demîr Çelîkî ard ziwan ke HDK-Ewropa do Îngilîstan, Elmanya, Fransa û Awûstûrya ra pîya, pêroyîya Ewropa de kampanyaya 'Nê’ bidê ramiten û seba ke na kampanya serbikewo, dê bikerê hereket. Çelîkî vist vîrî ke pêrokîn kerdenanê antî demokratîk ê Erdoganî, girewtiş, destser ronayîşê şaredarîyan nîşaneyê çin kerdişî yê û wina va: “Ma dê zî Ewropa ra bi eşrawitişê 1 mîlyon vengî destek bidê. Ma zanê ke bi veşnayîş û welişnayîşê sûkanê ma, bi cêrzemînan de kiştişê însananê ma, bi girotişê des hezaran embazanê ma, AKP hewl dana ke emrê xo derg bikero.
M dê zî 16ê Nîsanî de vera nê polîtîkayan de sîleyeke gird rîyê Erdoganî ro dê û cewab bidê kerdenanê ci yê faşîzan.” Demîr Çelîkî tewr peynî de aşkere kerd ke seba vernîgirewtişê rejîma faşîst yê Erdoganî, ganî ê weçîntoxê Awropa seba vengê ‘Nê’ bi rêxistin bikerê.
SERKAN DEMÎREL / ANF / BERN