Partîya Demokratîke ya Şaran (HDP) heme rêxistinanê xo yê bajar û qezayan rê perspektîfêk erşawite û rêxistinanê xo ra waşte ke wa seba konferansê ke aşma çileyî de bêrî viraştiş, xebatan bidî destpêkerdiş.
Perspektîf de bale ancîyayo muhîmîya nê konferansan ser û ameyo vatiş ke nê konferansî do xerîteya donemo ameyoxî û têkoşînî dîyar bikerî. Reyna perspektîf de wina ameyo vatiş: “Nê konferansê ke do dûştê herême de bêrî viraştiş ra ver ganî îdareyê bajar û qezayan taxan ra heta konferansê herême her hetan reyde xebatanê ortaxan bivirazî. Nê kombîyayîşan de do persanê ‘Girdbîyayîşê HDPyî, averberdişê têkoşînê aştî û demokrasî, xurtkerdişê muxalefetî û sewbîna’ rê cewabî bêrî gêrayîş.
Tarîxê konferansê ke ameyî plankerdiş, wina yî: 6ê çileyê 2018î Bursa (Bajarê Marmara), 6ê çileyî Amed, 7ê çileyî Îzmîr (Bajarê Ege û Herêma Antalya), 7ê çileyî bajarê Serhedî-Wan, 13ê çileyî Stenbol (Bajarê Trakya û Stenbol), 13ê çileyî Anqara (Bajarê Anatolîyaya Mîyanên), 14ê çileyî Samsun (Bajarê Karadenîzî), 14ê çileyî Edene (Bajarê Çukurova).
Heto bîn ra tarîxê konferansê meclîsê cinîyan zî ame aşkerekerdiş. Tarîxî wina yî: 6ê çileyî Îzmîr, 6ê çileyî Wan, 7ê çileyî Amed, 7ê çileyî Bursa, 13ê çileyî Edene, 14ê çileyî Stenbol, 14ê çileyî Anqara. Netîceyê ke nê konferansan de bêrî girewtiş, do konferanso merkezî ke 3-4ê sibate de Anqara de bêro viraştiş de bêrî çareserkerdiş.
ANF/ANQARA