Partîya Şaran ya Demokratîke (HDP) bi şewe û roje xebatanê xo yê weçînayîşî domnena. HDPyîyê ke heta suhurî kampanyaya weçînayîşî domnenî, raştê eleqeyêko gird yenî. HDPyîyê ke xebatê weçînayîşî domnenî, dîyar kenî ke ê do 24ê Hezîrane de cewab bidî.
Sere de Amed, Êlih, Sêrt, Wan, Şirnex, Edene, Mêrsîn û sewbîna xeylê cayan de xebatê weçînayîşî dewam kerdî. Na çarçewa de akerdişê buroyê weçînayîşî, zîyaretê esnaf û keyeyan û sewbîna tewir bi tewir xebatî ameyî kerdiş û şarî ra destek ame waştiş.
AMED
Qezaya Yenîşehîrî ya Amedî de Cadeyê Lîseyî de buroyê weçînayîşî ame akerdiş. Namzedê Amedî û bi seyan kesî beşdarê akerdişî bîyî. Akerdiş de sloganê ‘HDP yeno bendê weçînayîşî derbaz keno’ erzîyayî. Şar bi dawil û zurna govende girewt. Namzed Mehmet Temîzyuzî qisey kerd û wina va: “Weçînayîşî seba kurdan yena manaya estene yan zî çinêbîyayîşî. Weçînayîşan de wa yew ray bidîyo HDP yew ray zî bidîyo Demîrtaşî. Ganî yew raya ma Anqara, raya bîne zî Edîrne bileqno.”
ÊLIH
Taxa Çamlitepe ya Merkezî de buroyê weçînayîşî ame akerdiş û bi seyan kesî beşdarê akerdişî bîyî. Posterêko gird yê Demîrtaşî taxe de ame aliqnayîş. Hetkara Hemserekîya HDPyî Ayşe Acar Başarane, namzedê HDPyî, Dayîkê Aştîye û sewbîna beşdar bîyî. Akerdiş de sloganî erzîyayî û marşê ‘Çerxa Şorişî’ ame wendiş. Başarane qisey kerde û dîyar kerde ke her raya ke 24ê Hezîrane de bidîyo, do tecrîdî bişikno. Dima ra akerdişê buroyî ame kerdiş û taxanê Petrolkent û 19 Mayisî de vilawekî ameyî vilakerdiş.
Cizîr, Silopî de sey mîtînge akerdi î
Qezayê Cizîr û Silopî yê Şirnexî de buroyê weçînayîşî ameyî akerdiş û bi hezaran kesî beşdarê akerdişê mîtînge bîyî. Akerdişê buroyan bi coşêko gird derbaz bi. Zafaneyê kesan cinî û ciwanî bî û keyeyê şehîdan zî beşdarê akerdişî bîyî. Akerdiş de siloganê ‘Bicuye xoverdayîşê HDPyî’, ‘Ma do bi xoverdayîşî qezenç bikerî’, ‘Dayîka Taybete bêmerg a’, ‘Ha ya Cizîr, ha ya serewedarnayîş’ û sewbîna ameyî eştiş. Qiseykerdişî ameyî kerdiş û qiseykerdişan ra dima akerdişî bi govende girewtî.
SÊRT
Bajarê Sêrtî de amadekarîya mîtînga ke Hemserekê HDPyî Sezaî Temellîyî Sêrt de bivirazo dewam kenî. Qezayanê Sêrtî de xebatê mîtînge dewam kerdî. Namzed û xebatkarê HDPyî beşdarê xebatan bîyî û raştê eleqeyêko gird ameyî. Namzede Meral Daniş Beştaşe zî merkezê Sêrtî de şar dawetê mîtînge kerde.
Ma do hesabê ci pers bikerî
Qezaya Artemêtanî ya Wanî de buroyê weçînayîşî ame akerdiş û sere de namzedê HDPyî û xeylê kesî beşdarê akerdişî bîyî. Tîya de namzed Tayyîp Temelî qisey kerd û wina va: Ma do 24ê Hezîrane de hesabê zulm û dîktatorîye pers bikerî. Ma do wina hesab bipersî ke qet xo vîra nêkerî. Ma do serbikewî, serbikewî.”
EDENE
Qezaya Seyhanî ya Edene de buroyê weçînayîşî ame akerdiş. Herçiqas ke varanêko zêde vara zî, şar bi coşêko gird beşdarê akerdişî bi. Namzede Sever Uzune akerdiş de qisey kerde û wina va: “Nê coşê şima do bendan derbaz bikero. Ma coşê şima ver benî heyecanin. Bêrê ma 24ê Hezîrane de cewabo lazim bidî.”
MÊRSÎN
Tarsus, Akdenîz, Toroslar û Yenîşehîrî de buroyê weçînayîşî ameyî akerdiş. Akerdişan de namzedî raştê eleqeyêko gird ameyî. Warê akerdişan de sloganê‘ Ma HDP ver bi Meclîs’ olan dayî. Namzedan ra Fatma Kurtulane bale ante prosesê çareserîye ser û wina va: “Seba ke nêşênayî bi ma, parlamenter, hemserek û xebatkarê ma tewqîf kerdî. Ma do 24ê Hezîrane de serbikewî.”
MERKEZÊ XEBERAN