Hukmat êndî dewlete de çiqaşe ke tomarî estê, pêro xenekitê. Dest ke eşto kotî, her ca ra pixarîye rezena. Hukmatê Tirkîya her ca de serê pêro çengû (çengan) gureto, wazeno ke kes qe helm mecê ro.3 gaware (payîza peyêne) 2002îne de hukmat ke ame serê Tirkîya, her kes ebe rişwet ver, îltîmas ver, feqirên ver û herb ver bêzar bîbî. Hukmat serrûnê verênî, tayê çîyê raştî kî (zî) viraştî, hama çitur ke êndî bî serdest (muktedîr), fikrê xuyê raştî giran giran (hêdî hêdî) ard werte. Raver mazlum bî dima (badê) bî serdest, peynîye de kî bî mitayît. Dima kî her çî rê bî musayît.
Serrûnê verênî, mesela (girê) kurdû ser û mesela demoqrasî ser xeyle gamî eştî, hama çitur ke hukmatên ra vejîyayî êndî bî dewlete, her çî xo vîra kerd. Zorbajêna eskerî (leşker) vake, hama (labele) çitur ke eskerîye gurete bandira xo qe pelge nêlewnê. ‘YOK’ nîya ro, henî (winî) yo vatene, çitur ke guret bandira xo êndî veng nêvet. Polîs nîya ro henî yo vatene, çitur ke guret bandira xo, polîsê ma merxasê vake. Cênîyî bêheqê vake, çitur ke leçege (çitike) rê serbestîye arde, êndî cênîyû rê heqeret kerd.
Kurdî bêheqê vatene, çitur ke serdestîya xo kerde qeyim, kurdû rê herb na ro. Sîyasetkar, wendekar, domanî û cênîyî eşt bindestxane. Neyra kî nêmendî, Roboskî de qirrim viraşt. Şîyazet rê sifir tolerans vake, hama her ca de dewam kerd. Dewrê înû de rapolê ÎHD (Komela Heqa Îsonîye) rê 183 (se û heştay û hîre) domanî kîşîyayî. Na serrûnê peyênî, êndî “jû (yew) miradê ma esto, o kî nara tepîya azê ma kîndar (rikdar) û dîndar bo” vake.
Di serre ra raver, ebe marîfetê sîyasetkarûnê kurdû, gundê dîyalogî dest pêkerd. Sera, di serrî şîyê, hama hona (hîna) muzekkereyî dest pênêkerîyê. Heqa kurdû dayene nîya bimano, tayê heqîye ke kurdû guretê, înû kî wazene ke bijêrê. Alawîyû ser hawt rey gurîyayîş (xebetîyayîş) na ro, hama hata nika qe çîye nêviraşt. Heqa alawîyû qebul kerdene nîya bimano, heqe ke Mehkemewo Heqanê İsonên ya Ewropa dê, înû bîla qebul nêkenê. Ne heqa cemxane qebul kenê ne kî zorbajêna dersa dîn caverdanê. Hukmato AKP ke ame kar ser, her kes rişwet û partîzanên ra bêzar bîbi. Ewro nîyada me ke her cayê AKP ra nê rişînê. Kamjî kemere ke wedarî me bin ra boe û pixarîye vejîna.Qomê Tirkîya xeylê waxt, marîfetê na hukmat ser bêveng bî. Xoverdayîşê Taqsîmî ra hata nika tayê xoverdayîşî virajînê, hama çi hêfo ke qomê Tirkîya jêde têlewe nînê. Na hal ra şik (guman) çîn o ke zeraro pîl cênîyî vênenê. Çike fikrê na hukmatî êndî belîyo. Wazeno ke dewrê xo de, cênîyî qe ortê de measê. Wazene ke cênîyî çê de bimanê, serre de jû doman bîyarê, mêrdê xo rê xizmete bikerê. Dewrê na hukmatî de %400 (se de çar û sey) cênîyû rê tacîz, pê kaykerdîş (ci erjîyayîş) û cerb (zixm) jêdiyo. Dewrê hukmatêna AKP de, 5406 (panc hazar û çar sey û şeş) cênîyî kîşîyê.
Yanê roce de 3-4 cênîyî ebe destê dewlete, destê mêrde, destê pî, destê lacekî û destê birayî kîşîyê.Dewrê na hukmatî de heqê gurêkarî kî peyser şîyê. Karkerî destê gurêdarû de bîyê bindest. Heqa sendîqa destê karkerû ra gureta, pêro eştê bextê qabalîyû (taşeronû). Dewrê AKP de DÎSK rê gorê 11282 (des û jû hazar û heştay û di) karkerî qedayû ra nêseveknê, na sevet (semed) ra merdê. Soma, Ermenek hen zane me ke hona vîrê her kes der ê.Çare nawo ke gereke her kes êndî xo ver erzo, ya kî destê xo bine kemere kero. Xizir to carê ma de birese vajîme hama, hete ra kî ma destê bere çike ame, gereke ey kî bivirajîme. Verê ma de asma hezîrane (amnana verêne) de weçînîtîş esto. Na weçînîtîş de gereke pêro cênîyi, kurdî, alawîyi, karkerî, demoqratî û sosyalistî verê xo biçarnê HDP. Çike HDP nîşanê xoverdayîş, xeleşîyayîş û jûbînyayîşa.
DAÎMÎ DOGAN