Bi nizdîbîyayîşê weçînayîşê 24ê Hezîrane her roje xebatê weçînayîşî zê vilayê cayanê cîya-cîyayan benî. Na çarçewa de amedijî qisey kerdî û dîyar kerdî ke ê do rayanê xo bidî HDP û Selahattîn Demîrtaşî.
Amedijan ra Vedat Tutulmazî dîyar kerd ke tena HDP aştîye pawena û wina domna: “Ewro namzedê Serekkomarîye yê HDPyî Selahattîn Demîrtaş zîndan de yo û no zî eybê welatî yo. Îqtîdar seba ke Demîrtaşî sey raqîbê xo vîneno, ey serbest veranêdano.”
Ferît Çelîkî zî wina va: “Mi heta nika qet raya xo nêdaya AKP. Nika dewa mi qedexe ya û ez nêşêna şêra dewa xo. Seba ke ez bişînba bi hawayo huzirin bicuya, ez raya xo dana HDP. Ganî Demîrtaş teber de bo.” Mehmet Zekîyî zî da zanayîş seba ke HDP û Demîrtaş ey temsîl kenî, o do raya xo bido înan.
Seba welatêko hîna demokratîke
Îrfan Yorulmazî va ‘seba cuyêka hîna başe û edaletin ez raya xo dana HDP’ û wina dewam kerd: “Ez mamosta ya û herçiqas ke heqê sendîkalî qanûno bingeyî de esto, labelê reyna zî sey sendîkaya terorî yena nawitiş. Xeylê mamostayê ma hedef ameyî nawitiş. Cok ra ez raya xo dana HDP.” Mehmet Demîrcanî zî ard ziwan ke îqtîdar seba ke xo bixelisno, weçînayîş virazeno û va ‘Ez do ra ya xo bida HDP yo ke seba şarê xo xebitîyeno’.
HDP têkoşînê ortax yê şaran a
Hatîce Tekdale zî fikrê xo aşkere kerde û wina va: “Mi 16 serran mîyan de qetilbîyayîşê cinîyan ra vîşêr çîyêko bîn nêdî. HDP têkoşînê ortax yê şaran a. Cok ra ez raya xo dana HDP.” Amedijan ra Haci Nasirî zî veng da heme kurdan ke wa raya xo bidî partîya xo û va ‘Wa kurdî raya xo nêdî îttîfaqê AKP û MHPyî’. Mehmet Gormezî zî va ‘seba ke HDP mi rê hîna samîmî aseno, ez raya xo dana HDP’. Tewr peynî Yaşar Gurmezî dagîrkerîya Efrînî ard vîr û wina va: “Hende merdimî merdî. Cok ra ez raya xo dana HDP.”
MA / AMED