Rayvistişê HDPe ya Amed seba weçînayişê 1’ê Teşrîne dayişê starê kampanyaya weçînayişî Navenda Kultir û Ciwanan a Cigerxwin de bernameya namzedan kerd. Bernameye ra namzedê Amedî, hemserekê Şaredarî Şaristano Gird a Amedî, rayedarê DBP a Amedî û zaf hûmarîy de heskerdoxê HDPe beşdar bîyî. Wekîlê HDPe Îdrîs Baluken zî weçînayişê 1’ê Teşrîne de bername û stratejîya HDPe ser rojnameye ra ma ra qise kerd.  


Şima sey HDP 7’ê hezîranî de beşdarê weçînayîşî bî û do semedê weçînayîşê 1’ê teşrîne zî do bibî. Xora persgirêkê şima ya vîyarnayîşê weçînayîşî zî çino. Gelo bernameya şima ya weçînayîşî ya Amedî dîyar bîyo an na, şima do xebatê senî bidî meşnayîş?  

Tabî zereyê Amed û zereyê heme Kurdistanî de xebatê ma yê weçînayîşî dest pê kenî. 2’ê aşmî de Enqereye de kombîyayîşê ma esta. Heme namzedê ma yenî pêser. Ma aye kombîyayîşî ra dima xebatê xo danî destpêkerdiş. Semedê Amedî zî ma eşkenî vacî no kombîyayîşî ra dima do xebatê ma hîna başêr do bibî. Xora şima zî zanî emserr mîyanê heme Kurdistanî de yew lej esto. hukimatê AKPe her ca de qetlîaman virazena. 

Merdimanê ma qetil kena. No semedî ra asayîşê weçînayîşê Kurdistanî de persgirêk esto. Xebatê ma zî zafane ser sindoqan o. heta nika kamder dormarî, kamder keyeyî rayê xo nêdayî ma, hîna zafêr xebatê ma do înan sero bibo. Ger ke hemverê nêy qetlîam û kiştişî de hema zî yew şêro rayê xo bido AKPe se aye kêmanîya ma ya xeylê gird a. 

No semedî ra heta nika kamî raya xo dayo AKP ma do ser înan bivindî. Ma eşkenî înan rê îzeh bikî. Çimkî AKP qetilkarê Zergele, Cizîr, Şemzînan, Licê, Farqîn û Bismîlî ya. Ger ke hemverê nêy qetlîaman de xebatek baş bêro kerdiş se aye çax AKP mîyanê Kurdistanî de vînî bena û bena yew partîya tabelaye. Yanî xebatê ma ser girse sero ney, zafêr ser sindoqan sero do bibo.


Şima verîya nika qalîkerdişê xo de bal antbî ser Pêvînayîşê Dolmabahçeye û şima vatbi: “Aştîye rê yew hefte mendbî, labelê kiştişê serekê ÎHYA-DERî reyde konseptê şerî ame destpêkerdiş û 1’ê Teşrîne de do ma nêy konseptî veng bivecî.” Gelo şima 1’ê teşrîne de şima bawer kenî ke konseptê şerî û aye yew hefteyo ke aştî rê mendbî werte ra wedarnî?

Eya raşt o; çimkî no weçînayîş sey referandumî yo. Duştê ma de êy sey blokê şerî û ma zî sey blokê aştîye duştê înan de estî. Ger ke no weçînayîşî de serkewtişek gird bêro dest vistiş aye wext yew nêşkeno no konseptê şerî rayna bîyaro vernîya ma. Xora şarê Tirkîyaye aştîye wazenî. Eyro dewlet zî vana êy ke paştî danî ravêreyeya çareserîye sera hewtayê şarê Tirkîyaye yî. 

Ger ke welatekî de sera hewtayê şarî paştî danî aştî û çareserîye sero aye çax hukimatek bi kêfê xo nêşkeno bira şerî bido û qetlîaman bivirazo. Ger ke goreyê weçînayîşê 7’ê hezîranî no weçînayîşî de serkewtişek hîna girdêr bêro qezenckerdiş aye wext hukimatbîyîşê AKPe qedêno. No 13 serra ke AKP îqtîdar o û êdî wextê ya yê şîyîşî ameyo. Ma 7’ê hezîranî de îqtîdarê ci binî ra leqna. Labelê semedê weçînayîşê 1’ê hezîranî leqnayîş êdî ma rê bes nîyo, ma vanî ma do AKPe binî ra biqedênî.


Şima verîya nika vat bi ke ma statuwaştişê kurdan bi serkewtişê weçînayîşî dekenî rojdemê Ewropa û heme dinyaye. Goreyê 7’ê hezîranî şima çi ser xebatê xo yê verên kenî. Ya zî gelo vêşîkerdişek esto an na?

Xora AKP yew harîta Kurdistan de akerd werte û serranê 90’î de na harîtaye ra ‘Heremê OHALî’ ameynê vatiş. AKP zî harîtayekî operasyonî viraşta. Yanî tîya de mîyanê no heremî de qedexekerdiş, teda, qetlîam, operasyon û sewbîna zaf çî esto. No harîtaya ke bi nameyê asayîşî ameya werte ma wazenî bi weçînayîşî ra dima qerarê sîyasî wa şarê kurd bidî. Yanî ger ke şarê kurd wayîrê doz û îradeya xo rê bivejî no bernameya AKPe qedêna. 

Yanî Amedî de lazim o 11 wekîlan ra hemînan ma bivecî, Êlihî de ger ke 4 wekîl bibî se lazim o AKP weyra ra wekîl nêvejo. Rayna Mûş, Sêrt, Bedlîs, Wan, Colemêrg, Agirî û heme cayî de lazim o AKP qet wekîl nêveco. Ger ke wina bibo aye harîtaya OHALî ke AKP viraşto veng vecêna. Ger ke ma Kurdistanî de AKP biqedênî se aye wext na harîta bena statuya şarê kurd î. No semedî ra weçînayîş semedê Kurdistan û Tirkîyaye zaf muhîm o. Goreyê min HDP no weçînayîşî de sera 15’î ra vîşêr do rayan bigîro.


KADRÎ ESEN/AMED