Hemserekê Pêroyî yê HDPyî Pervîn Buldane û Sezaî Temellîyî seba aktîvîstê kurd Ramîn Huseyîn Penahîyo ke derheqê ci de cezaya îdamî ameya dayene, Sersefîrê Îranî yê Îranî Mohammad Ebrahîm Taherîan Fard rê mektûbêk erşawite.
Hemserekan mektûbe de qala averşîyayîşê ke derheqê Penahîyî de benî kerdo û wina vato: “Prosesê mehkemekerdişî yê Penahîyî huqûqo mîyanneteweyî ra dûrî domîyeno. Ganî mehkemekerdişê Penahîyî goreyê huqûqê mîyanneteweyî bêro viraştene. Ma veng danî Komara Îslamî ya Îranî ke wa goş bidî waştişê raya pêroyî.”
Yeno zanayene Penahî 2017 de bi hawayo birîndar amebi tepiştene û destê ci sîleh çinêbi. 3 embazê ci amebî înfaz kerdene. Penahî dima ra bi îdîaya endamê rêxistina Komala bîyayene ra amebi tewqîf kerdene û cezaya îdamî dîyaybî ey. Cezaya ci aşma Nîsane de ameybî tesdîq kerdene û reaksîyonan ver cezaya ci ameye vindarnayene. Penahî nika beno ke her vîste de bêro îdam kerdene.
Tehlukeyê îdamî domîyeno
Avûkatê Penahîyî Hisên Ehmedî Nîyazî zî derheqê Penahîyî de qisey kerd. Nîyazî va ‘tehlukeyê îdambîyayîşî yê Penahîyî dewam keno û rewşa ci ya weşîye her ke şono hîna xirabêr beno’ û wina domna: “Gurçika çepe ya Penahîyî de enfeksîyon virazîyayo. Mi derheqê Penahîyî de raporêk amade kerd û mi waşt ke wa doktorî eleqeder bibî. Labelê nê waştişê ma nêame qebul kerdene. Ganî pawitoxê heqê merdiman vera îdamî de bivinderî û destek bidî kampanyayan.”
ANQERE