Vizêr bajarê Manîsa de roniştişo yewin yê mehkemeya 150 HDPyîyê ke 2 serrî yo tewqîfkerde bî, dest pêkerd. Hetkarê Hemserekîya HDPyî Osman Baydemîr, Saruhan Oluç û Sezaî Temellî, parlamenter Ertugrul Kurkçu û Mizgîn Irgate zî beşdarê mehkeme bîyî.
Roniştişê mehkeme ra ver heyetî îzehetêk da. Ser nameyê heyetî Baydemîrî dîyar kerd ke edalet amêna komelî yo û wina dewam kerd: “Edalet piştîdayîşêyewbînan bi xo yo. Eke komelêk de edalet bêro wedarnayîş, o wext yeno manaya aye amêne zî xira bîya.”
Baydemîrî dewamê qiseykerdişê xo de va ‘çi heyf ke 2 serrî yo ke no welat de heme heq û azadîyî hetê partîya îqtîdarî ra girîyayî binê lingan’ û wina dewam kerd: “Ewro bawerîya ti kesî dezgeyanê edaletî rê nêmenda. Nizdîyê 2 serrî yo ke teşkîlatê ma yê Manîsa zîndan de yî. Eke no welat de huqûqî ser o çîyêk mendbo, ganî embazanê ma ra ozrê xo biwazî û tazmînat bidî nê merdiman. Manîsa de nika 4 hemserekî zîndan de yî. Nê merdimî seba ke sîyasetêko demokratîk kerdî, tewqîfkerde yî.”
Nê zextî nêşênî HDPyî bêveng bikerî
Baydemîrî dewamê qiseykerdişê xo de wina va: “Do rojêk huqûq herkesî rê lazim bibo. Kesê ke 2009 de 10 hezarî ra zêde sîyasetmedaranê kurdan eştî zîndan bi xo nika zîndanan de yî. Neheqî kamî ra yena wa bêro, ganî ma vera ci de bivinderî. Tevgerê şarî hêzê xo şarî ra gêno. Wa şikê ti kesî çinêbo, nê zextî nêşênî HDPyî bêveng bikerî. Do rojêk bêro, kesê ke nê neheqîyan kenî, wijdanê şarî de mehkûm bibî.”
ANF/ANQARA