Bajaranê cîya cîya yê Almanya ra nizdîyê 70 kurdistanîyê ke namzedê hecîtî yî, Komelê Îslamî yê Kurdistanî (CÎK) ser ro reya sifteyîne bi nasnameyê xo seba şîyayîşê Heccî muracat kerdî.
Selahîyetdarê organîzasyonê Yewîya Îslamî yê Tirkan ya Karê Dîyanetî (DÎTÎB) û Mîllî Goruş seba ke vîzeyê hecîyanê kurdan betal bikerî, zaf hewl dayî. CÎKî problemê vîzeyî bi mektuba ke Dîvanê Keyeyê Kralîyetî rê nuşt, çareser kerd. Mektube ra dima Keyeyê Kralîyetî bi mabênkarîya Sefîrîya Erebîstano Siudî vîze da namzedanê hecîtîye yê kurdan.
Babete ser o Serekê Pêroyî yê CÎKî Hafiz Turhalliyo ke Rasteyê Teyarayan yê Frankfurtî de namzedanê Heccî oxir kerd, wina va: “Ma sey CÎKî emser reya sifteyîn a ke bi nasnameyê xo muracatê hecîtîye kerd. Labelê çi çeyf ke DÎTÎB û Mîllî Goruş waştî mudaxale bikerî. Ma nê astengîyan bi têkoşînê xo derbaz kerd. Ma bi hawayo 3 grûban de hecîyanê xo oxir kerd.”
Ma mecbûr î heme cayan de bibîy
Turhalliyî dewamê qiseykerdişê xo de vengdayîşêko winasî kerd: “Ez tîya ra veng dana heme kurdistanîyê ke do şêrî Hecc. Kesê ke do şêrî Hecc, wa bi tesilî bi mabênkarîya CÎKî şerî. Ma kurdî ganî heme cayan de bibîy. Seba nêyî ez veng dana herkesî ke wa no het de hesas bibîy. Ganî bi organîzasyonê tirkan nêşêrî Hecc. Ma veng danî heme kurdan ke wa nasnameyê xo rê wayîr bivejyî.”
Îzehetî ra dima namzedê hecîtîyî keyeyanê xo ra xatir waştî û bi teyaraya Cîdde kewtî rayîr. Namzedî do 13ê êlule de biagêrîy Almanya.
FRANKFURT/ANF