KCK da zonayen ke êrişê Rojawa, êrişê dûştê pêrokîn kurdanê û vera herekatê îşgalî yê dewleta tirk, kurdan û quwetanê demokrasî ra waşt ke bikewê miyanê hereketî. Konseya Rayverîn eleqe ant îşgal û plananê lîmin ê dewleta tirk ser û vist vîrî ke dewleta tirk planê îşgalkerdişê Cerablûs, bado ke Minbic çeteyan ra kerdîya pak vist dewre û komkiştena Dîlok zî, seba na waşten bi DAIŞ ra pîya viraşt.
Seba îşgalê Cerablus qetlîama Dîlok viraştî
KCK dewletê ke çimê xo herekatê îşgalî ra girotê zî rexne kerdî û wina va: “Dewleta tirt weyna mîyanê çimê dinya û komkiştena Dîlok viraşt. Behaneyê îşgalkerdişê Cerablûs vet werte. Qandê îşgalî zafê ci qeçekî, nezdiyê 60 kesî kerdî qurban. Çiyê winayin serva dewletê ke çimê xo îşgalî rê girotî şermê tewr girdo.” KCK ard ziwan ke kayê Cerablûs fina bîn hetkarînê Dewleta Tirk û DAIŞ ravist ver çiman û wina dewam kerd: “Dewleta tirk û çeteyanê ci, Cerablûs ra DAIŞ nêvet. DAIŞ peynîyê pêkerdişî de peyser ancîya. Hedefê dewleta tirk û çeteyanê ci DAIŞ niya, teniya jew hedefê ci esto, o zî Quwetê Surîyeya Demokratîk o.”
KCK îşgalkerdişê Cerablûs êrişê vera hewldanê ronayişê Surîyeya Demokratîk hesibna û va: “Xora rayverê dewleta tirk bi xo zî vanê ke, hedefê esasî YPG û Quwetê Surîyeya Demokratîk o. Bi na êrişî ra wazenê Federasyonê Bakûrê Surîye bigîrê. Hedefê kurdan de letekerdişê Surîye çinîyo. Wazenê bi demokrasî ra Jûwîna Surîye bi quwet bikerê. La belê Tirkîye, tersê nay wazena vernîyê destkewtişanê kurdan bigîro. Bi bêçareserîn ternayişî, wazenê Surîye zayif biternê. Bi nayî tesîrê xo Surîye sero vêşî bikero.”
Ganî Jûbîyena quwetanê demokratîk ronîyo
KCK vist vîrî ke kurdî Rojakewtişê Mîyanî de rayverînê demokrasî kenê û aşkere kerd ke dewleta tirk wazena statukoyê verîn biramno. KCK va: “Cok ra kurd û dînamîkê ke rayverînê demokrasî kenê, hedef genê, cok ra gerek heme kurdî û dînamîkê demokrasî ê Rojakewtişê Mîyanî nê êrişanê dewleta tirk zey êrişê vera xo bivînê û vengê xo berz bikirê.” KCK vera hewldayenê îşgalî veng da heme kurdan û quwetanê demokratî û wina va: “Lazimo şarê ma û quwetê demokratîkî quwetê xo bikerê jew, heme cayan de vengê xo berz bikerê. Bi rihê 6-7-8ê Cotmeng û 1ê Mijdarî Roja Kobanê yê Dinya werzê ser pay.
ANF/NAVENDÊ XEBERAN