Hêrişa Dara Hênê ra dima vizêr seatanê sodir de quwetanê dewlet Dara Hênê û Kanîreş de eştî bananê DBP û HDP û keyeyanî îdarekaranê DBP û HDP ser. Xêlê îdarekarê DBP û HDP girotîyay bin çiman. Sereştişî de kêberî amey şikitiş û dest nay xêlê poster û kitaban ser o.
HDB û DBPyijî girotîyay bin çiman
Netîceyê sereştişan de Hemserokê HDP yê Çewlîg Zerîn Berdibek û Mahmût Bozan, Hemserokê DBP yê sûk Zeynep Yûrtsever û Feyzûllah Şeyhanoglû, Hemşaredarê HDP yê Dara Hênê Alî Yaşar, îdarekarê qeza Zafer Akçîçek, Mahmût Demîrel û azayê MP yê DBP Adnan Sari girotîya bin çiman. Kesê ke girotîyay bin çiman berdîyê Emnîyeta Midûrîyetî.
Polîsan herzewbîn eştî Komela Wendekarê Zangehê Çewlig (BUODER) ser zî û dest nay poster û kitabanê ronayoxa PKK Sakîne Cansiz ser o zî.
Mûş û Dersim de 9 kesî girotîyay bin çiman
Mûş de zî Azaya Meclîsê Partî yê DBP Mizgîn Çîftçî wextê qontrolê kamî yê ser raya Mûş-Çewlig de, ser fermana dozgerîn amê binçimgirewten û Emnîyeta Midûrîyetî de yena giroten.
Dersim de zî bado ke 13 gerîlayan 16ê aşmê de weşîya xo kerd vinî, sûk de esnafan 21ê aşme de kepengê xo girotî û dûştê bombevornayen û herbî nêrazîbîyenê xo damûsnay û ciwîyayişî vindernay. Peycoy operasyonê binçimgirewtenî dest kerdî ci. Hemseroka DBP yê Dersim Hulya Yer, Hemserokê HDP yê sûk Aslan Çag ra pîya îdarekarê DBP û esnafan ra pîya 8 kes girotîyay bin çiman. Quwetanê dewlet dest nay telefonanê kesê ke ameybinçimkerdiş ro.
Peyser gam nêerzeme
Heto bîn ra rêxistinanê HDP û DBP yê Çewlîg operasyonanê binçimgirotişî bi damûstayîneke çapemenî protesto kerdî. Îdarekarê HDP, DBP û wendekaran ra pîya xêlê welatijî tewrê damûstayîn bî. Endamê Meclîsê DBP yê sûk Cîhat Yildirimî damûstayîn de qisey kerd û vist vîrî ke bi zext û zorvajîyan wazenê ters bidê ma û aşkere kerd ke hewl danê ke DBP û HDP zey rêxistinê îlegal bidê damûsnayiş. Yildirimî vist vîrî ke eynî polîtîkayî serranê 90î de zî amey ramitiş la netîce nêame giroten. Cîhat Yildirimî tewr peynî de aşkere kerd ke zext û zorvajî dê nêşkenê tekoşîn ra peyser gam bidê eştiş û va heta ke haştî bîro ronayen dê çi destê înan ra bîro bikerê. Yildirimî waşt ke kesê ke amey binçimgiroten desinde serbest bîrê veradayen.
ÇEWLIG / MÛŞ / DERSIM