Serekkomar Tayyîp Erdogan qiseykerdişo ke roja çarşeme kerdbî de dîyar kerdbî ke do Colemêrg û Şirnex statuyê bajarî ra bivejyî û herinda înan de Cizîr û Gever bibî bajar.
Bajarê ke Serekkomar qalan înan keno, zafaneyê înan ameyî rijnayîş. Bitaybetî se ra 70ê bajarê Şirnexî ameyo rijnayîş û 4 taxanê Geverî de zî bano ke keye tede bimano nêmendo. Vera qerarê statuyê bajarî ra vetişê Şirnex û Colemêrgî de rêxistinê sîvîlî û şar bireaksîyon o. Babete sero Parlamentera HDPyî ya Şirnexî Aycan Îrmeze qisey kerde.
Parlamentere Îrmeze va bi sebebanê sîyasîyan ver wazenî Cizîr û Gever bikerî bajar û wina domnaye: “Şirnex zî seba ke bikerî bajarê ewleyîye kerdbî bajar. Seba sebebanê sosyal û ekonomîkan ver nêkenî bajar. Hedefê îqtîdarî o yo ke Cizîra ke tewr nizdîyê Rojawanî ya de hîna zaf hêzê xo yê leşkerî pêser bikero. Xora polîtîkaya hukmatî ya Rojawanî zî dîyar a. Hukmat wazeno cizîr bikero bajarê ewleyîye; cok ra wina keno.”
Ganî sey bajar bimanî
Îrmeze dewamê qiseykerdişê xo de va ‘seba nê qerarî fikrê şar û rêxistinanê sîvîlan nêameyo girewtiş’ û wina dewam kerde: “Şirnex verê cû qezaya Sêrtî bî. O wext seba ewleyî Şirnex bî bajar, labelê Sêrt zî sey bajar mend. Ganî fikrê şar û temsîlkaranê şarî bêro girewtiş. Îradeya şarî nîna naskerdiş. Qerarêko winasî do şarî mexdûr bikero. Her çiqas ke nika Şirnex sey bajarî yena dîyayîş, se ra 70ê ci ameyo rijnayîş. Bi no hawa şarê tîya ceza kenî. Eşkenî Cizîr bikerî bajar, labelê ganî Şirnex zî sey bajar bimano.”
ANF/ŞIRNAK