Hetê nêy hêrişan de medya zî dijî cenîyan ziwanê mêrdeyî xebetnena. Tewr peynî Farqîn de polîs bi bombeya qaz û awa şidênaye hêrişê Hemsereka HDPe Fîgen Yuksekdag kerdbî. Rojnameya Yenî Akîtî zî awayo ‘Fîgen Yuksekdag a ke waşt şêra Farqîn hî bî’ nuştbi medyaya komelkî de zî vatişê sey ‘Porê Yuksekdagî xirab bi’ gêray. Babete sero Endama Meclîso Daîmî ya KCDe Mulkîye Bîrtane qalîkerd.
AKP medya girewta destê xo
Bîrtane qalîkerdişê xo de ziwanê medyaye ya mêrdeyî ard ziwan û wina verdewam kerd: “AKP semedê ke bişînbo vernîya têkoşînê cenîyan bigîro, medyaya pêroyîn girewta destê xo. Hêrişê dewlete ya dijê cenîyan bi awayo lez dom keno. Colemêrgî de Selma Irmak, Farqîn de Fîgen Yuksekdag raştê hêrişan amey. Dewlet cenîyan ra, têkoşînê û vîrdozîya cenîyan ra tersena û no semedî ra hêrişê cenîyan kena.”
Hedefê dewlet de cenî estê
Mulkîye ciresna ke hedefê sifteyîn de cenîyî estî û wina domna: “Dewlet ewil hêrişê xo ser cenîyan de kena û dima zî ciwan û domanan qetil kena. Lazim o heme tê reyde bêrî destgirewtiş. Semedê ke îqtîdarîya înan destê înan ra nêşêro, kura de kesê ke cuyê newe wazenî estî ra hêriş kenî. Îqtîdarê AKPe têkoşînê cenîyan ra tersena û no semedî ra destur nêdana. AKP wazena hêrişo ke panc hezar serre yo ke cenî sero yeno kerdiş, bida domnayîş. Dijî nêy têkoşînê cenîyan zî her ke şono beno gird.”
Verra hêrişan hewcedariya yewbiyîn esta
Bîrtane ard ziwan ke ziwanê medyaye bin bandora hukimatê AKPe de ya û wina peynî kerd: “Îqtîdar senî fikiryeno se medya zî heman awayî ana ziwan. Yanî îqtîdar senî nêzdîyê cenîye beno se, medya zî bi heman pergalî nêzdîyê cenîye bena. No zîhnîyetê mêrdeyî ra eleqedar o. Ziwanekî ke cenîyî sîyasetî ra dur bitepişo, yeno şuxilnayîş. Lazim o ma cenîyî dijî nînan bibî yew û têkoşînê xo gird bikî û no ziwanî bibedilnî.”
TEKOŞÎN TEKÎN/BERÎTAN ELYAKUT/JINHA/AMED