Fermandaranê Ceyş El-Siwar ra Ehmed Sûltan Ebû Erac ke tewrê “Cengo Gird” beno, derheqê qewimyayîşanê Heleb, Efrîn û Îdlîbê de qisey kerd û vist vîrî ke emelê sereke yê Tirkîye îşgalkerdişê Îdlîb o.
Reqa de operasyonê “Cengo Gird” ke hetê Hêzanê Sûrîyeya Demokratîk (QSD) ame destpakerdiş, bêmavên rameno. Fermandarê Ceyş El-Siwar Ehmed Sûltan Ebû Erac ke tewrê “Cengo Gird”î beno ard ziwan ke vera DAIŞ pirodayîşê tewr giran herêma Şehba de qewimyenê û vist vîrî ke wextê peynî de na herêm de Tirkîya vera quwetanê înan de kişta sîyasî û leşkerî de amadekarîyanê hêrîşan kena.
Goreyê vatenanê Eracî, Tirkîya wazena bi Rûsya ra pîya vera înan de şer bikero û aşkere kerd ke ê dê cewabê pêrokîn hêrîşan bidê.
Ehmed Sûltan Ebû Erac vist vîrî ke Tirkîya Îdlîb kerdo merkezê komanê leşkerî û sîyasî ke piştîdayîşê înan dana û va, “Bado ke Tirkîya û Rûsya pêkerdî, pêrokîn çeteyê Hama, Hûmûs, Heleb, Şam û cayanê bîn nê cayan de amey bicakerdiş. Sifte ra plana Tirkîya na bî.”
Wazena Îdlîbêka "Tirkîyê” ronê
Fermandaranê Ceyş El-Siwar ra Ehmed Sûltan Ebû Eracî vist vîrî ke derdê Tirkîya pawitişê şarî nîyo, wazena Îdlîbêka "Tirkîyê” ronê. Eracî da zonayen ke Tirkîya rewna ra destpê nê xebatan kerdo û wina dewam kerd: “Do no herêm zî bivistno bin kontrolê xo û zey xeta ravêrnayîşê leşkerî bixebetno. Yeno waşten ke çeteyê ke sûkanê bîn ê Sûrîye de amey dorpêçkerdiş xo xelas bikerê. Hedefê sifteyin yê Tirkîya îşgalkerdişê Îdlîb o. Seba nayî ser sînor de tayî koman zî perwerde kena û ê dê seba hêrîşê ma bikerê ver bi herêmanê ma birişê.”
Her ca de yê
Ebû Eracî vist vîrî ke ê seba xelesnayîşê şarê Sûrîye şîyê Reqa û tewrê operasyonî bîyê û aşkere kerd ke Sûrîye de merkezê tewr gird yê DAIŞ’î Reqa yo. Eracî dîyar kerd ke seba ke ê sûka xo çeteyan ra peyser bigîrê Şehba ra şîyê verbi Reqa û qiseyanê xo wina qedêna: “Mîyanê quwetanê ma de kurd, ereb û suryanî estê.Heleb, Hama û Hûmûs ra şervanî mîyanê ma de estê. Îdlîb ra zî xeylê kesî mîyanê ma de estê. Mavêna ma de ti ferq çin o. Ma amadeyê ke Hesekê, Reqa, Dêra û Dera de seba şarê xo têkoşîn bikerê.”
DÎHABER/REQA
QSD Reqa dorpêç kerd
Hêzanê Sûrîyeya Demokratîk (QSD), sûka Reqa ke çeteyê DAIŞ zey paytext weçîna bi, dorpêç kerd. Quwetanê QSD aşkere kerdî ke înan rayê remnayîşî DAIŞ rê girotî.
Temsîlkarê Koalîsyonî Mîralay Ryan Dîllon zî ard ziwan ke pêrokîn rayê esasî yê başûrê sûk nika destê QSD de yê. Dîllon vist vîrî ke QSD, çend hetan ra şina ser çeteyanê DAIŞ.