2 rojî verê Taxa Şexanî ya Licêya Amedî de leşkeran eştbi keyeyêk ser de û netîceyê sereştişî de bi nameyê Bayram Ekîncîyo 29 serrî de kesêk qetil kerdbi. Heta nika derheqê kişîyayîşê Ekîncîyî de îzehetêk nêameyo dayene.
Datê Ekîncîyî Halît Ekîncîyo ke merkezê Licê de cuyeno, îdîa kerd ke birazayê ci Bayram Ekîncî bi hawayo qestî ameyo qetilkerdene. Ame musayene ke leşkeran Ekîncîyo ke dosyayêka edlî ver problemê ci yê huqûqî estî ra vato ‘bireme’ û dima ra ci qetil kerdo.
Dat Ekîncîyî dîyar kerd ke qaso ke înan dewijan ra melumat girewto, birazayê ci bi saxî ameyo tepiştene û dima ra ameyo înfazkerdene. Ekîncîyî dewamê qiseykerdişê xo de wina va: “Badê ke leşkeran birazayê mi tepişto, ti ra vato ‘bireme’ û o zî remayo. Leşkeran zî pey ra gule varnayî ey ser de û ey qetil kerdo. Seba 4 aşmî cezaya zîndanî senî ciwanêk yeno kiştene? Ka edalet, ka qanûn? Ma do seba ke berpirsîyarî bêrî mehkemekerdene, gerre bikerî.”
Heto bîn ra ame musayene ke Dozgerîya Komare ya Licê derheqê mergê Ekîncîyî de tehqîqat dayo destpêkerdene.
MA/AMED