HABÎBE EREN / DUYGU EROL / ANQARA
Çend rojî verê karkerê demserrî yê ke Riha ra şîybî Samsun, ewja de raştê hêrişê nîjadperestan ameybî û netîceyê hêrişî de kesêk merdbî û kesêk zî birîndar bîbî. Hêrs û reaksîyonê ke vera hêrişî de yenî, her ke şono hîna hîra benî.
Babete ser o Hemsereka Pêroyî ya HDPyî Serpîl Kemalbaye qisey kerde.
Kemalbaye va ‘no hêrişêko sifteyîn nîyo, karkerî goreyê polîtîkayanê îqtîdarî zaf reyan raştê hêrişanê winasîyan yenî’ û wina dewam kerde: “Hêrişanê winasîyan de ceza nêdîyena hêrişkaran û nê hêrişî polîtîkayanê AKPyî ra qerfîyaye nîyî. Komel yeno parçekerdiş û vera yewbînan de dîyenî parçekerdiş. Bi şert û mercê winasî wazenî dayîşê têkoşînî orte ra wedarnî. Ganî vera nêyî de seba wedarîyayîşê OHALî pîya têkoşîn bêro dayîş.”
Ganî muxalefet bivindarno
Kemalbaye dîyar kerde ke seba vindarnayîşê rejîmê kesêkî ganî polîtîkayî bêrî averberdiş û bale ante çalakîya grevê vêşanî ya Nurîye Gulmene û Semîh Ozakçayî ser. Kemalbaye wina va: “Rewşa înan ancax bi têkoşînêko ortax no proses bêro vindarnayîş netîce gêna. Karkerê demserrî zafane kesanê ke şer ra remayî ra pê yenî. Cok ra ti karker nê şert û mercan nêwazeno. Nê cayan de şert û mercê zaf giranî estî, sey nimûne nêverdanî tayê herêman de karkerê kurdî bêrî bixebetyî. Îqtîdar şert û mercan baş nêkeno, eksê ci de polîtîkayanê cîyakerdişî erzeno dewre. Ganî merdim ver nêyî xo rêxistine bikero û sendîkabîyayîş lazim o.”