Qezaya Ercîşî ya Wanî de taxa Sulû de polîsan wesayîtêkî ser de gule varnaybî û netîceyê panayîşê guleyan de 2 kesî ra yewe zî wayîrê wesayîtî Zafer Ceyhan bî. Wextê definbîyayîşê cenazeya Zafer Ceyhanî de birayê ci Îbrahîm Ceyhan û datîzayê ci Mujdat Ceyhan hetê polîsan ra bi hawayo derbkerdiş ameybî tepiştiş.
Badê ke îfadeyê her di datîzayan ame girewtiş her di zî serbest ameyî veradayîş. Her di datîzayan derheqê çîyê ke Mudurîya Asayîşî de cuyaye de melumatî dayî.
Îbrahîm Ceyhan wexto ke xebera mergî ya birayê xo gêno, bajarê Gîresunî yo ke seba xebetîyayîşî şîbî ra cade agêreno. Ceyhanî va ‘birayê mi bin nameyê PKKyîye de ame kiştiş, labelê no raşt nîyo’ û wina dewam kerd: “4 domanê birayê mi estbî û birayê mi karê taksîkarîye kerdêne.”
Dayî sereyê mi ro
Polîsan bi vatişê ‘Ti kam î, ma ti dewlete ra pîlêr î?’Ceyhanî derb kerdbî û tepiştbî. Ceyhanî qiseykerdişê xo de bale ant ê vatiş û dîmenan ser û wina va: “Tîya de ma ra vatî ‘ganî 10 kesî ra zêdeyêr ti kes nêro definkerdişê cenaze’. Ma zî wina kerd. Ma pêro pîya 15 kesî seba definkerdişî şîyî. Wexto ke karê definkerdişî qedîya, mi vera polîsan de reaksîyon nîşan da. Cok ra hêrişê ma kerdî. Ma bi hawayo ters kelepçe kerdî û tepiştî. Wexto ke ez erd de bîya, polîs ame da sereyê mi ro. Ma qet vera înan de çîyêk nêkerd û cewabê înan nêda, labelê ê îdîa kerdî ke ma zî dayo înan ro. Darî reyde dayî sere, qirik û linganê mi ro. Cok ra vengê mi şî. Linga mi dejena. Bi çîyêko wişkî dayî sereyê mi ro. Wexto ke ma berdî nêweşxane, doktoran ma muayene nêkerd. Polîsan destûr nêda doktorî muayene bikerî. Sereyê ma ver bi dêsî bî. Bi o hawa çîyê ke polîsan va, raporê ma nuştî. Wexto ke ma veradîyayî, ma reyna şîyî nêweşxane. Ma nika paweyê netîceyê tehlîlan î.”
Sîleh dayî sereyê mi ser û mi tehdît kerdî
Mujdat Ceyhanî zî va ‘demêko derg mi derb kerdî’ û qiseykerdişê xo wina domna: “Polîsî sîleh dekerd fekê mi mîyan û mi mergî reyde tehdît kerd. Bado ke ma cenaze defin kerd, hêrişê ma kerdî. Datîzayê mi ewja de reaksîyon nîşan da. Ewja de nizdîyê 20 polîsî estbî, ma eştbî erd û bi dare, kulmike, paşkul û sewbîna dayênê ma ro. Mi zî va ‘mekerê’. Polîsêkî sîlehî dekerd fekê mi mîyan û mi ra va ‘ez to kişena’. Bi sîleh û dare dayî rîyê mi ro. Dima ra ez destê înan ra remaya û sîleh destê ci ra kewt. Wexto ke sîleh kewt, mi ra vatî ‘to sîlehî girewt û dayî mi ro’. Bi şarjorê sîlehî dayî sîneyê mi ro. Ez xeriqîyaya û kewta erd. Bi ê halê mi de destê mi kelepçe kerdî. Demêko derg erd de mi dayî paşkulan ver. Heqaretê polîsan mîyanê wesayîtî de zî dewam kerd. Wexto ke fam kerdî ke ê neheq î, êdî bi hawayo baş nizdîyê ma bîyî. Dima ra ma verdayî û ma ameyî nêweşxane.”
UGUR ATABAY / MA/ WAN