SAFÎYE ALAGAŞ / JINNEWS/AMED
Qezaya Licê ya Amedî de 14ê Hezîrana 2017î de dayîka Pakîze Hazara 85 serreyî wexto ke seba ke maeşê xo yo extîyarî bigîro, şîyêne, Cehdeyê Mumînaga de netîceyê pirodayîşê wesayîtê zirxinî de ameybî qetilkerdiş. Hedîse ra dima şofêrê wesayîtî Çawişo Pispor Sercan Kara verê amebî tepiştiş, labelê dima ra serbest amebî veradayîş û derheqê ci de tehqîqat dîyabî destpêkerdiş.
Fermandarîya Cendirmeyan ya Licê ke Sercan Kara girêdayeyê ci yo, deheqê tehqîqatî de raporêkî amade kerde û raporê xo de herinda ke Karayo ke cehdeyo wesayîtan rê padaye de wesayît ramito qusurin bivîno, rapor de seba Pakîze Hazare vatişê ‘bêdîqet û bêtedbîr bîya’ xebetnayo. Fermandarîye raporê xo de ca nêdayo trafîk rê padaye bîyayîşê cehdeyî û îdîa kerdo ke şofêr qusurin nîyo.
Şofêr se ra 100 qusurin o
Dezgehê Tibê Edlî (ATK) zî derheqê hedîseyî de raporêkî amade kerd û raporê xo de eksê Fermandarîya Cendirmeyan ya Licê de şofêrê wesayîtî qusurin dî. ATKyî hoka vînayîşî ya şofêrî û cayo ke Pakîze Hazare tira derbaz bîya ser o cigêrayîş kerdî û netîceyê cigêrayîşan de dîyar kerd ke Pakîze Hazare hoka vînayîşî ya şofêrê wesayîtî de ya. Heto bîn ra ATKyî bale anto trafîkî rê padaye bîyayîşê cehdeyî ser û vato ‘Şofêr Sercan Kara ser a 100 qusurin o’.
Hewl danî ci bêsuc bikerî
Çawişo Pispor Sercan Karayo ke hedîse ra dima Mudurîya Asayîşî ya Licê de îfadeyê ci amebî girewtiş, îfadeyê xo de îdîa vatbî ke ‘mi şîyayîşî ra ver eyneyê wesayîtî kontrol kerdî, labelê seba ke hoka vînayîşî teng bîye, mi Pakîze Hazare nêdî’. Seke yeno zanayîş polîsê ke îfadeyê Karayî girewtbî, sey vatişê Karayî qisey kerdbî û vatbî ‘badê ke wesayît daya Hazare ro û 25 metre ra dima, wexto ke karmedêko bîn seba ke trafîkî akero peya bîyo, Hazare ferq kerdo. Labelê zabito ke ameyo tepiştiş de yeno dîyayîş ke Pakîze Hazare badê ke binê wesayîtê zirxinî de 50 metre kirancîyaya, wexto ke karmêndêko bîn seba ke trafîkî akero, peya bîyo ameya ferqkerdiş.
Melumatî yenî nimitiş
Heme zabitê ke hetê polîs û cendirmeyan ra ameyî amadekerdiş de Sercan Kara bêsuc dîyeno, labelê Pakîze Hazare qusurin yena dîyayîş. Labelê dîyar o ke hedîse de sucêko giran esto. Avûkatê Pakîze Hazare Serdar Yelî seba ke delîlî nêrî vînîkerdiş, dozgerî ra waştbî ke wa qeydê kamerayî bierzî dosya mîyan. Dosya de xeylê delîl û melumatî yenî niminayîş. Çawişo Pispor Sercan Kara bi hawayo serbest yeno mehkemekerdiş.