Ma heme zanê ke Tirkîya de çew (kes) nêeşkeno qalê heqê merdiman bikero. Hîrê serrî yo ke heqê merdiman nêmendo û roje bi roje pê kerdenanê xo Tirkîya no rewşe kerd xorî. Verê hîrê hewte bajarê Îstanbol de pawitoxanê heqê merdiman semedê xebatê nêheqîyan amêbî pêser. Înan rewşa heqê merdiman yê Tirkîya ser o û şîyayîşê sîyaseta Tirkîya ser o qalkerdêne. Labelê dewlete mudaxeleyê xebatê înan kerd û nê aktivîstan tepişt. Pawitoxanê heqê merdiman ra des tenî nêzdîyê di hewte nezaretî de mendî. Beyntarê nê di hewte de dewlete heme televîzyon û çapemenî de derheqê înan de zaf xeberan da viraştiş û çapemenîya hetkar zî bi fermanê sermîyananê dewlete nê aktivîstanê heqê merdiman “terorîst” îlan kerd.
Pê xeberanê zurî her roj televîzyonan de nê merdîman ser o xeylek çî amey vatiş û xeylek zî munaqeşe bî. Heto bîn ra dozgerîye Îstanbol zî îzahatêko winayin da: “Nê merdîman ser Tirkîya komployêko gird organîze kerdî û semedê nayî amêbî pêhet. Nê pêrokînî “terorîst” ê û planê derbeyêka newe kerdêne û hemeyê înan besteyê dişmenanê Tirkîya yî. Nê kesî binê nameyê heqê merdiman de gûreyê “terorî” kenî.” Dozgerîyê Îstanbolî pêro çapemenî de înan wina damûsna û teşîr kerd.
Di hewteyan ra dima nê aktivîstî vejyay vernîya mehkeme, înan ra şeş ê ci kerdî mehkum û erşawitî hepisxane. Çahar ê ci zî bi şertê îmze serbest veradîyay. No qerarî hem mîyanê Tirkîya de hem zî Ewropa û dinya de veng da û raştê reaksîyonan ame. Xeylek dewletan bi îzahatanê fermî waştî ke kesê ke tepêşîyay zî serbest bîrê veradayen. La ne Erdoganî û ne zî hukmatê ci paxê nê vengdayîşan nêkerd. Erdoganî va, “Nê merdîmî pawitoxanê heqê merdiman nîyê, ê ajanê dewletanê xerîbî yî, dişmenê Tirkîya yî û “terorîst” î”
Mehkeme ra dima avûkatanê înan izahat da û her çî kerdî eşkere. Deste dozgerîye û mehkeme de qet yew delîlê rastî çînîbi, tena destê mehkeme de yew şahîd esto û o zî şahîdê nimite bi. Mehkeme nê pawitoxanê heqê merdiman pêbestî heme rêxistinan. Goreyê mehkeme ê hem PKKyî bî, hem Feto’yî bî û hem zî DHKPCyî bî. Ame îdîakerdiş ke nê kesan pê (bi) nê rêxistinan derbeyêka pîl organîze kerdî. Sûcdarkerdişê nê merdiman sey yew sehneyê tîyatro bi. Heta nîka ma sey na mesele zaf meseleyî dî. La gelo çi ra rewşa nê kesan henday kerdî gîran? Qey sehneyê tîyatroyî viraştî? Qey nê kesî erzîyayî hepisxane.
Erdogan zerreyê Tirkîya de her çî goreyê xo keno. Kam yew qal vajo, kam heqê xo biwazo, kam nîyetê yew çalakî bikero, verba êy de kam venge xo berz bikero, kam polîtîkayanê êy rexne bikero, kam rastîye rîyê înan eşkere bikero, kam verba înan de bivindero; hema înan pê yew fermanê Erdoganî tepêşenê û tewqîf kenê. Yanî Erdoganî Tirkîya goreyê dîktatorîya xo îdare keno. Kam ke ser rahar (rayîre) êy de bivejîyo se, înan hedef damûsneno û keno vîn. Nê pawitoxanê heqê merdiman zî dîktatorîya Erdoganî deşîfre kerdî û nêheqîyan bi raporêke raya pêroyî yê mîyannetewe de kerdêne vila. Raştî de rapora înan veng da û zaf tesîr kerd.
Erdoganî heta ewro mîyane Tirkîya de venge heme çapemenî birna, zaf sîyasetkaran eşt hepisxane, her kesî tersna û ser her kesî de hûkmê xo ferz kerd. Nika kes nêeşkeno fikir û waştenanê xo bi vengin bîyaro ser ziwan. La nê pawitoxanê heqê merdiman dêsê tersî yê Erdoganî şikitî û pêro bêhuqûqîyanê ci dinya rê beyan kerdî. Na ridî ra Erdoganî semedê vengbirnayîşê înan tiyatroyêko pîl organîze kerd. Winî aseno ke izehetê mehkeme û Erdoganî yê zey “terorîst”î ra çew bawer nêkeno. Ma zanê ke rîya rastî peynî de vecîyeno orte. Erdogan pê tepiştişan, pê vengbirnayişan nêeşkeno xo bixelesno. Heme dîktatorî pê kerdenanê xo peynîya xo anî. Tarîxê însanetîye de her wext wina bîyo û peynîyê Erdoganî zî do wina bibo. Hem zî dûr nîyo, wextekê zaf nêzdî de dezîye (laya) xo do pê destê xo bianco.