Madeyo ke warê zeytûnêran seba awankerdişê sanayî û madenan akeno, 7 reyan ameybî rojeva meclîsî û her 7 reyan de zî vera na made de reaksîyonî ameybî. Nika zî paketêk bi nameyê Paketê Reformî yê Berardişî rojeva meclîs de yo. No paket 76 madeyan ra pê yeno û hesaban ra seba averberdiş û destegdayîşê sanayî û berardişî yeno vetiş. Babete ser o Hetkara Hemserekîya HDPyî ya ke Ekolojîyî ra Berpirsîyar a Prof. Beyza Ustune qisey kerde.
Ustune dîyar kerde ke AKP seba ke xo krîzî ra rizgar bikero, heme warê cuye û tebîetî teslîmê sermaye kerdo û qiseykerdişê xo wina domnaye: “Tirkîya de krîzo ke her ke şono kûr beno, esto. AKP qaso ke no krîzî kûr nêkero, merge, zeytûnêr û daristanan pêşkêşê sermaye keno.”
Do reyna bîyarî
Ustune dewamê qiseykerdişê xo de va ‘no qanûn reya sifteyîne serra 2012 de amebî meclîs’ û wina dewam kerd: “No wext de zeytûnêrî 14 aşmî seba xebetnayîşî abîy. Dima ra mehkemeya îdareyî nê qanûnî vindarnaye û betal kerde. Mîyanê nê donemî de qasî 13 hezar hektar zeytûnêrî sanayî û madenan rê abî. Nika seba ke reaksîyonî ameyî, no qanûn ame vindarnayîş. Labelê bi temamî nêvindarnayî. Do reyna nê qanûnî bîyarî. Heta nika 7 reyan ardî û îxtîmal esto do hîna zaf bîyarî. Hewl danî nê waran bidî Wezîrîya Sanayî û Teknolojîyî.”
Binê tehluke de yî
Ustune qiseykerdişê xo de bale ante cayê ke bi îstîmlaqkerdişo lez dest ronîyayî ser û wina va: “Nê warî bi îstîmlaqkerdişo lez de dest ronîyayî ser de. Verê cû newal û awe pêşkêş antêne, nika zî daristan, merg, zeytûner û qeraxan pêşkêş kenî. Dima ra do heme rez û bexçeyan sermayeyî rê biakerî. Bi hawayo rew seba madenan ca akenî. No ekosîstemê ê cayan tehdît keno. Heme warî do bibî warê maden, enerjî û înşaatî.”
Heme do bimirî
Ustune peynîya qiseykerdişê xo de qala netîceyê pêşkêşkerdişê sermaye kerde û wina qedênaye: “Ekosîstem û dengeyê tebîetî do xira bibo. Gandarê ke nê waran de cuyenî do bedelî nêyî bidî û xeylê gandarî do vînî bibî. Eke mozî vînî bibî do cuye peynî bibo. Wexto ke merdim bedilîyayîşê dinya ra ewnîyeno, eke mudaxaleyê herikîyayîşê tebîetî bêro kerdiş, o wext do heme gandarî bedelê nêyî bidî.”
DÎHABER/STENBOL