Verfekê Heyetê Îmrali Sirri Surreyya Onderî derheqê tecrîdo ke Rayberê Şarê Kurd Abdullah Ocalanî ser de yeno meşnayîş de va ‘seba ke wextê ci de îtîraz nêame kerdiş, nika welat heme girîyayo binê tecrîdî. Hemserekê HDPyî yê Êlihî Toguçî zî va ‘seba çareserîye pêvînayîş şert o.’
Nizdîyê 19 serrî yo ke Rayberê Şarê Kurdî Abdullah Ocalan binê tecrîdî de yeno tepiştiş û nê 2 serrî yo zî Ocalanî ra ti xebere nîna girewtiş.
Vera tecrîdî de 7 serreyî ra heta 70 serreyî kurdî û dostê kurdan Ewropa, Kurdistan, Rojhelato Mîyanên û sewbîna zaf cayan de payan ser de yî û seba weşî, ewleyî û azadîya Ocalanî çalakîyan virazenî. Babete ser o Verfekê Heyetê Îmrali û Parlamenterê HDPyî Sirri Surreyya Onder û Hemserekê HDPyî yê Êlihî Nîzamettîn Toguçî qisey kerdî.
Onderî va ‘badê ke tayê xeberî medyaya komelkî ser o ameyî parekerdiş, ma sey Heyetê Îmrali waşt şêrî Îmrali, labelê ma muracatê xo ra ti netîce nêgirewt’ û wina dewam kerd: “Ma seba nêyî selahîyetdaran reyde pêvînayîş viraşt, labelê ma ti netîce nêgirewt. No het de israrê ma dewam kerd û heta ke pêvînayîş bibo do bidomîyo zî.”
Seba ke ma îtîraz nêkerd wina bî
Onderî dewamê qiseykerdişê xo de dîyar kerd ke seba ke wextê xo de ma vera sîstemê tecrîdî de îtîraz nêkerd, ewro rejîmî heme welat girewto binê tecrîdî û wina domna: “Her ke şono hîna zaf welatî îzole kenî. Kamcîn wext welat de tecrîd açarîya dîyalog, welat de aştî, demokrasî û aramî hakim bîyî. Labelê kamcîn wext tecrîd giran bî, o wext kaos û pêrodayîşî vejîyayî. Sey Heyetê Îmrali amancê ma o bî ke ma nê ferqî bidî zanayîş.”
Ê zî vera dîplomasîya lêmine de sere ronayî
Onderî bale ant ser rolê dezgehanê mîyanneteweyîyan yê sey Yewîya Ewropa, Konseyê Ewropa û Yewîya Miletan ser û wina va: “Heme dezgeyê mîyanneteweyî binê tesîrê zîhnîyetêko teng de mendî. Tirkîya meseleya bextwaştoxan sey tehdîdî xebetnena. Na mesele ser heme dezgeyan de tesîr kena. Nê dezgeyan ra CPT qet hesasîyet nîşan nêdano. Ganî CPT prosesêko winasî yo hesas de îzehetêk bidayêne. Bêvengmendişê înan nîşan dano ke binê tesîrê dîplomasîyêka lêmine de yî.”
Onderî va ‘raştîya xo de dewlete Birêz Ocalanî baş şinasnena’ û wina dewam kerd: “Çimkî diyalog û prosesê taqîpkerdişî yê dergi estî. Ma prosesê pêvînayîşî de çekuyanê înan ra fam kerdênê ke çiqas vera ey de rêze nîşan danî. Ê zî bi hawayo baş zanî ke Birêz Ocalan goreyê waştişê înan hereket nêkeno. Sere ra nata qet projeyê înan yê çareserîye çinêbî. Tecrîd tena meseleya Ocalanî nîya, ez veng dana heme sazî û dezgeyan ke wa vera tecrîdî de bivinderî.”
Seba çareserîye pêvînayîş şert o
Heto bîn ra Parlamentero kehen yê DEPî Nîzamettîn Toguço ke seba Hemserekîya HDPyî ya Êlihî ame weçînayîş zî tecrîd ser o qisey kerd. Toguçî va ‘ez tecrîdo ke Birêz Ocalanî ser de yeno bicaardiş, şermizar kena’ û wina domna: “Tecrîd sucê merdimîye yo. No het de bêvengmendişê dezgeyanê mîyanneteweyîyan nîno qebulkerdiş. Tena bîyayîşê pêvînayîşî qîm nêkeno, ganî Ocalan bi temamî azade bibo. Birêz Ocalan mîmarê aştîye yo. Ez hêvî kena ke proses reyna biagêro pêvînayîşan ser. Problemê kurdî ancax bi dîyalog û aştîye çareser beno.”
NAVENDÊ XEBERAN