Fermandarê Pêroyî yê Artêşa Şorişgeran Haci Ahmedî derheqê çîyê ke bajarê Şehba yê Rojawanî de benî de qisey kerd û eleqe ant hemkarîya ke mabênê Tirkîya, Rûsya û rejîmê Baasî de awan bîya ser. Haci Ahmedî va ‘blokajê Minbicî û hemleya Reqa ra dima mabênê Rûsya û Tirkîya de nizdîbîyayîşêk esto’ û wina va: “Herêma Şehba de Îranî reyde têkilîyê cîddî awan kerdî. Netîceyê nê hemkarîye de mabênê rejîmê Sûrîye û Tirkîya de qenalê têkilîye yê bihêz zî awan kerdî. Îstîxbaratêk aver berdî û nika ê îstîxbaratî vera ma de xebetnenî. Na hemkarî beno ke vernîya ma de bikirişîya hetanê bînan zî.”
Şehba veng kerdî
Ahmedî va ‘se ra 70ê herême ameyo vengkerdiş’ û wina dewam kerd: “Zafaneyê şarî ya bi sucdarkerdiş yan zî bi cînayetanê kerdoxê înan dîyar nîyo, orte ra wedarnayî. Nêyî zî bi destê Tugayê El Nusra, Ehrar El Şam, Sultan Murat û Yavuz Sultan Selîmî ameyî kerdiş. Kesê ke gênî hedefê xo, ey remnenî û îşkenceyan ra derbaz kenî. Dima ra bi pereyêko zêde serbest veradanî û herême ra dûrî kenî. Yan zî kesê ke erşawenî surgin, mal û milkê înan danî tirkmenan û bi no hawa rayîrê peyserameyîşê înan padenî. Merdimê ke nêşênî debara xo bikerî zî mecbûr manenî mal û milkê xo biroşî. No zî beno sebebê koçkerdişêko bîn. Nê raybazî Ezaz ra heta Cerablusî yenî meşnayîş. Merdiman ra mal û milkê înan bi pere herînenî û bi no hawa hewl danî herêmêka pîlote awan bikerî. Na polîtîka zî zafane ser Çobanbeyî ra aver benî.”
Haci Ahmedî dîyar kerd ke dewleta tirk vera grûbê ke êdî qîmetê înan nêmendî de tevgerê tasfîyekerdişî daya destpêkerdiş û wina va: “Tirkîya tewr zaf grûbanê tirkmenan bihêz kena. Dewleta tirk cayê ke dagîr kena rê nê grûbê ke girêdayeyê aye yî, erşawena.”
Îran û Sûrîye zî mîyan de yî
Ahmedî vist vîrî ke dewleta tirke cayê ke dagîr kena, fotografê Ataturkî aliqnen û polîtîkayanê tirkkerdişî meşnenî û peynî de va: “Tirkmen û erebê ke Xumus, Hama û Şam ra ardîyayî dormeyê koyê Tirkmenî û Îdlîbî de ameyî bicakerdiş. Îran û Sûrîye zî mîyanê nê karan de yî.
SEYIT EVRAN / ANF / ŞEHBA