Endama Koordînasyonê Partîya Azadîya Cinîye ya Kurdistanî (PAJK) Melsa Botane derheqê Hemleya 1ê Hezîrane de qisey kerde û serrgêra 13. ya Hemleya 1ê Hezîrane ser o vînayîşê xo arde ziwan.
Endama Koordînasyonê PAJKÎ Botane va ‘wexto ke hemleya 15ê tebaxe virazîya her kesî vatênê; êdî kurdî nêşênî biwerzî lingan ser’ û wina domnaye: “Vatênê wexto ke Şêx Seîdî 2 cendirmeyî kişt, nîmeyê Kurdistanî şî. Reyna vatênê do reyêko bîn kurdî nêşênbî biwerzî payan ser û wayîrê nasnameyê xo bivejyî. Bi nê psîkolojîyî nizdîyê şarê kurdî bîyênê, şerêko taybet ser şarê kurdî de meşnayênê. Xeylê partîyê ke nasnameyê kurdan nêpawitêne, vejîyabî orte. Cok ra şarê kurd de hêvîyêka girde estbîye. Rayberîya Embaz Egîdî ruhêko newe xelq kerdbî û bi xeylê nameyanê sey guleyo yewin, kilaya adirî, newekerdişê nasnameyê kurdî û newe ra welidîyayîşê kurdan yeno binamekerdiş. 15ê temuze vera tarîtîye de roşnî ya.”
Bingeyê hemle 2002 û 2003 de ame eştiş
Botane qiseykerdişê xo de bale ante muhîmîya 1ê Hezîrane ser û wina dewam kerde: “O proses de Komploya Mîyanneteweyî virazîyabî. Ez bawer kena ke reya sifteyîne vera kesêk de hende hêzî bîbîy yewe. Dişmenî vatêne; wextê şero sîlehîn qedîya, rolê gerîla nêmend, şero modern dest pêkerd. Hêzê teberî no proses de AKP awan kerdî. Nêyî ra girêdaye 2003 de mudaxaleyê Amerîka yê Rojhelato Mîyanên virazîya. Yê ke mîyanê ma de zî vatêne ‘ganî ma zî bibedilyî, êdî lazim nîyo ma şero sîlehin bidomnî. Eke ma polîtîkaya raşte bimeşnî, ma eşkenî azadî qezenç bikerî’. Bingeyê hemle 2002 û 2003 de ame eştiş. Sifteyîn nizdîyê 500 embazî derbaz bîyî. Dêrsim, Erzirom, Amed, Botan û heme herêman de bi rayberîya Sorxwîne, Nûcane, Ferhat û Kurtayan na hemle dest pêkerde.”
Ganî ma Rayber Apo azad bikerî
Botane Hemleya 1ê Hezîrane ser o wina va: “Eke qerarê Hemleya 1ê Hezîrane nêameyêne dayîş, ma do xeylê tehlukeyan bicuyayênê. Her kes sey ke fîlmêk temaşe bikero, paweyê têkşîyayîşê rêxistine bîy. Labelê tevger reyêk de sey qertelî berz bî û fira. Hemleya 1ê Hezîrane çîyêko winasî bî. Wextê Xoverdayîşê Xoserîye de zî çîyê winasî ameyêne vatiş. Vatênê ‘Kurdistan xira bî, şar tersa’. Çîyêko winasî çin o. No xo xapênayîş o; no şar zano ke bi dagîrkerî cuye nîna xelqkerdiş û azadî nîna. Nika averşîyayîşê ke benî ser rehê Hemleya 1ê Hezîrane de awan bîyî. Embazê Îbrahîm, Huseyîn, Nuda, Sorxwîne, Çîçeke, Gulbahare, Adil û sewbîna fermandaran ruhêko newe dayî awankerdiş. Tarîxê Kurdistanî do reyêko bîn Sûrê Amedî ser ro ganî bibo. Ganî ma Rayber Apo azad bikerî.”
ANF/BRUKSEL