Fermandaranê Hêzê Pawitişê Şarî (HPG) ra Emîn Başkaleyî derheqê Serrgêra 33. ya 15ê Tebaxe de qisey kerd û vînayîşê xo ard ziwan.
Fermandar Başkaleyî va ‘hemleya ke rayberîya Fermandaro efsane Mahsum Korkmazî (Egîd) de 15ê Tebaxe 1984î de Dihê û Şaxî de dîyaybî destpêkerdiş, ewro hetê gerîlayan ra dewam kena’ û wina dewam kerd: “Vera îmha û înkarê ke şarê kurdî ser de ameyêne meşnayîş de guleyo sifteyîn panîya û bi no hawa toximê hêvî ame eştiş. Toximo ke 33 serrî verê amebî eştiş, roja ma ya ewro de seba heme şarê ke cuya azade gêrenî, ruhê têkoşîn û şerkerdişî xelq kerd.”
Başkaleyî dewamê qiseykerdişê xo de wina va: “Ez sere de Embaz Egîd û dûştê heme şehîdan vilê xo çewt kena. Ez Roşanê Xoverdayîşî yê 15ê Tebaxe sere de Rayberî û heme şaranê Kurdistanî rê pîroz kena. Bingeyê Hemleya 15e Tebaxe hetê Mazlum, Kemal, Hayrî û Kurtayan ra Zîndanê Amedî de ame eştiş. Na hemle hemleyêka tarîxî bîye. Hemle Dihê, Şax û Şemzînan de bi rayberîya Fermandar Egîdî de dîyaye destpêkerdiş û vera dewleta ke Kurdistan de polîtîkayê înkar û îmha meşnayêne de guleyo sifteyîn ame panayîş. No gule bî sebeb ke şar hetê leşkerî de vera dewleta hove de şer bikero. Hemleya Tebaxe Kurdistan û metropolanê Tirkîya de bîye sebebê averşîyayîşanê muhîman. Bi destpêkerdişê hemle çar parçeyê Kurdistanî de kilayê adirî veşayî.”
Bingeye şorişî
Başkaleyî dewamê qiseykerdişê xo de va ‘wexto ke hemle dest pêkerde, tayê etirî estbîy’ û qiseykerdişê xo wina domna: “Persê sey ‘gelo ma do serbikewî, an nê?’ estbîy. Badê ke Dihê kewt destê embazan û serkewtişê ke dima ra ameyî qezençkerdiş, şar de hêvîyêka girde awan kerdî. Tevgerê ma seba ke hêvîya şarî veng nêvejo, têkoşînêko xurt da. Seba ke muhîmî û manaya hemle bi şar bido famkerdiş, zaf kede dîyaye. Hemleya 15ê Tebaxe şar de motîvasyonêko gird awan kerd û şarî werizna payan ser. Cok ra na hemle hem seba PKK û hem zî seba Kurdistanî zaf muhîm a.”
Ma cewab da
Başkaleyî bale ant plananê tasfîyekerdişî yê hêzê dagîrkeran ser û wina va: “Her ke ma hemleya ke Egîdî daybî destpêkerdiş aver berd, hêz û dewletê dagîrkerî zî seba tasfîyekerdişê PKKyî planan viraştî. Vera operasyonê tasfîyekerdişî ke serrê 2000î de ameyî viraştiş de Hemleya 1ê Hezîrane dîyaye destpêkerdiş. Na hemle bîye sebeb ke tevger hem hetê sîyasî û hem zî hetê leşkerî de hêz qezenç bikero û xoverdayîşî aver bîşêro. Ma Hemleya Şerê Şarî yê Şorişgerî ke 2012 de dabî destpêkerdiş, netîceyê hemle de derbêka girde da dewlete ro. Hukmatî bi hawayo baş dî ke vera PKKyî de hêz vînî kerdo. Vera hêrişê çeteyanê DAIŞî ke 3ê Tebaxa 2014î de hêrişê Şengalî kerdî de gerîlayê ma bi ruhê Egîdî şerêko gird dayî. Şengal ame rizgarkerdiş. Reyna Şorişê Rojawanî ruhê xo Hemleya 15ê Tebaxe ra girewt. Sere de Cizîr, Sûr, Nisêbîn, Gever, Farqîn, Gimgim û zaf cayan de adirê şorişî berz bî û no adir zî bingeyê xo 15ê Tebaxe ra girewt. Eke ewro ma sey tevger Rojhelato Mîyanên de xeylê qezencî qezenc kerdî û bîyî hêzo dîyarkerd, bingeyê nê hemînan de ruhê 15ê Tebaxe esto.”
Hemleya 2017î azadîya Rayberî ya
Başkaleyî bale ante hemleya 2017î ser û wina va: “Na hemle azadîya Rayberîya ma esas gêna û na hemle de ruhê Egîd, Zîlane, Bêrîtane, Reşît, Adil û Nudayan esto. Bi na hemle xeta Zap û Zagrosan de û temamê Vakurê Kurdistanî de derbê girdî dîyayî dewlete ro. Seba ke PKK Rojhelato Mîyanên de her ke şono beno hêzin, dewleta tirk Başûr, Vakur û Rojawan de hêriş kena. Her ke ê hêriş kenî, şerwananê ma de ruhê Egîdî virazîyeno û dewlete vera nê ruhî de têk şona. Ganî ti kes vera zaliman de vilê xo çewt nêkero û têkoşîn bido.”