Hemşaredarê Bajarê Girdî yê Amedî Adnan Selçûk Mizrakli, hemşaredarê Bajarê Girdî yê Mêrdînî Ahmet Turk û hemşaredara Bajarê Girdî yê Wanî Bedîa Ozgokçe Ertane yê ke raştê derbeya qayûmî ameyî şaredaranê Ewropa rê mektûbe şawite.
Mektûba ke sere de Barcelona, Parîs, Londra, Stockholm, Oslo, Roma, Mîlano, Venedîk û xeylê şaredaranê Ewropa rê ame şawitene de bale ame antene muhîmîya şaredarîyanê Amed, Wan û Mêrdînî ser û ame vatene ke nê bajarê ke 3,8 mîlyon kesî dete ciwîyenê qelayê HDPyî yê.
Mektûbe de ameyo vatene ke ‘weçînitişê 31ê Adara 2019î de ma bi rayana zêdan na serekîya nê şaredarîyan girewte, la rixmê naye 19ê Tebaxe de qayûm herinda ma de ame cakerdene û ma wezîfeyê xo ra ameyî dûrfînayene’ û wina dewam kerdo: “Meclîsê şaredarîyanê ma bi qerarê keyfî ameyî vilakerdene. Ma nê qerarî sey derbeya hukmatî vînenê.”
‘Qayûman şaredarîyê ma talan kerdî’
Dewamê mektûbe de wina ameyo vatene: “Hewldayîşê derbeya 15ê Temmuza 2016î ra dima hemserekê ma yê pêroyî yê o wextî Selahattîn Demîrtaş û Fîgen Yuksekdage, parlamenter û hemşaredarê ma bîlaheq, bêhuqûqî ameyî tepiştene. 102 şaredarîyanê ma ra 95 rê reyna qayûmî amebî tayînkerdene. Hukmat sebebê qeyûmî sey terorî ramojneno la xora heme dinya zana ke goreyê Erdoganî kam ke kişta ey de nêyo o terorîst o. Reyna şaro ke wayîrê îradeya xo vejîyeno, raştê hêrişê polîsan yeno. Ma tîya pîya bi şarê xo rixmê heme hêrişan xover danê. Eke şima paştî bidê ma, ma naye ra hêz gênê.”
MA / AMED