Hemserekê Şaredarîya Bajarê Girdî yê Amedî Firat Anliyî  Kolêjê TEDî yê Amedî yo ke hetê Komela Karsaz û Sanayîgeranê Amedî ra bi şîarê “Ma Bajarê Xo û Markayanê xo nas bikê” ameyo viraştiş zîyaret kerd.

Parlementerê HDP yê Amedî Altan Tan, Serekê  DÎSÎAD Burç Baysal û xeylê karsazî Firat Anliyî de pîya kolêj zîyaret kerd. Serekê Heyetê Pêroyî yê TEDî yê Amedî Mehmet Kaya û Mudirê Mektebî Ozan Demîralp pîya ameyî kesê ke kolêjî zîyaret kerd ver û derheqê kolêjî de zanayîş da mêmanan.

Kesê ke mekteb zîyaret kerd dima ra şîyî Salona Konferansî yê TEDî û Serekê Heyetê Pêroyî yê TEDî Mehmet Kaya salone de yew qiseykerdiş kerd. Kayayî va “ Mekteb cayêko 19 hezar metrekare ser o ameyo viraştiş û cayo qefilnaye zî 20 hezar metrekare yo. Pêroyî de 30 mîlyon lîre mesrefê ci şîyo.” Dima ra  Mudirê Kolêjê TEDî Ozan Demîralpî zî yew qiseykerdiş kerd û derheqê falîyetanê mektebî de zanayîş da mêmanan.


Baysal: Wa na xebate bibo nimune 

Serekê  DÎSÎAD Burç Baysalî zî yew qiseykerdiş kerd û va “ Hîrê karsazê ma goreyê lazimtîya bajarî, kolejê TEDî akerd. Ma wazenê wa na xebata înan semedê heme karsazanê ma bibo nimune.” Heto bîn ra Baysalî seba Roşanê Remezanî waşt wa her kes esnafanê surî ra malzemeyanê xo biherîno.”


Mesajê Roja Aştî ya Dinya û Roşanê Qûrbanî da

Hemserekê Şaredarîya Bajarê Gird yê Amedî Firat Anliyî zî qiseykerdişê xo de eleqa ant wezîyetê eknomî yê herême ser o û wina va “Lazim o ma xeyalan ra zêdeyîr raştîyan ser o cuya xo biramnê. La onca zî xeyalî ma rê lazim ê. Ez hêvî kena ke kesê ke na salone de yê xeyalê înan ortax ê. Sey Martin Luther Kingî xeyalê ma pêro estê. Ez hêvî kena ke rojêk bêro û ma pêro cins, nijadî, bawerî û nasnameyanê yewbînan rê hurmet nîşan bidê” Anliyî dewamê qiseykerdişê xo de  behsê 1ê Êlıle Roja Aştî ya Dinya ke siba ya kerde û wina va “Lazim o ma Ewropaya 60-70 serre verêne bîyare xo vîr. Ma gereke demê 1ê Êlule Roja Aştî ya Dinya ra ver çi bîyo baş bizanê. O wext Ewropa mîyanê çi hal de bîye û nika senî îdare bena. Ewro beno ke ma zî rojanê zehmetinan ra vîyarenê. La vernîya ma de 1ê Êlule Roja Aştî ya Dinya û Roşanê Qûrbanî esto. Eke ma bieşkê aştî bîyarê, ma eşkenê nê erdan ser o pêro-pîya mîyanê hizurî de biciwîyê.”


Seba Sûrî waşt wa her kes çîyêk bikero 

Anliyî waşt wa semedê Mîyanê Sûrî çi destê kamî/e ra yeno wa bikero û wina va “Lazim o ma Mîyanê Sûrî newe ra bikerê sey verî. Ma sey Şaredarîya Bajarê Girdî sey her wextî soz danê. Meseleya Mîyanê Sûrî nasname û sîyasetî ra ser yew mesela ya. Çi destê ma ra bêro ma do semedê Sûrî bikerê.”

Parlementerê HDP yê Amedî Altan Tan zî en peynî yew qiseykerdiş kerd. Altanî va “Kesê ke no esero weşik Amed de viraştê, ez înan rê sipas kena. Ma wazenê wa nika ra tepîya zî winasî eserî bajarê ma de bêrê viraştêne.” 


 AMED