Goreyê raporê Komîsyonê Hepisxaneyan ê ÎHDî de zîdanan nika 1333 hepsê nêweş estê û mîyanê înan de rewşa 454 hepsê neweş zaf bi giran ê. Hepsîyan têkoşînê cuye danê, hetta bi dayişê raporê ATK û nêweşxaneyan zî daxî nînê serbestveradayiş.
Babete ser o Endama Komîsyonê Hepisxaneyan ê ÎHDî yê Stenbolî Hatîce Onaran qise kerd û vat ke seba balontişê teda û zilmê hepisxaneyan ser o serra 2012î ra nika çalakîyê roniştişê ‘F’î yenê kerdiş û wina vat: “Armancê nê çalakîyan rewşa hepsîyê nêweş rojdemî ra ardiş o. Çi heyfo ke îqtîdarê AKPî wazeno hetanê merdişî hepsîyê sîyasî hepisxanean de veradayişî yo. No ser nêweşxaneyan de zî xebatkaran tersî ra nêeşkenî wezîfeyê xo bikê. Raştîya welatî, hepisxaneyê welatî de yenî cuyayiş.”
Pratîkê Qetliamê 19’ê Kanûne
Endama Komîsyonê Hepisxaneyan ê ÎHDî yê Stenbolî Onaran Qetlîamê 19ê Kanûne ard vîr û aşkera kerd ke no qetlîam de 32 kesî cuya xo dayê û wina vat: “Taybetî demê OHALî ra pey hepisxaneyan de îxlalê teberê merdimî hîna zêdîyayê. Çi heyfo ke Qetlîamê 19’ê Kanûne hepisxaneyan de hema zî domyeno. Heqê cuyakerdişî Mekaqanûnî de ca gêno la belê şuxilnayiş de çin o. Hepisxaneyan de nika cayê 3 kesî de 10 kesî manenê. Hepsîyê neweş çi heyfo ke hepisxaneyan de cuya xo danê. Vatişê îqtîdarê AKPî elaqadarbîyayişê hepsîyê nêweş qet raşt nîyo. Ganî bi lezîhepsîyê nêweş bêrê serbest veradayiş, nika bi hetkarîya embazenê xo hepsîyê nêweş cuya xo domnenê.
Onaran tewro peynî bal ont ser Hepisxaneyê Tîpa E yê Sîîrtî de xokiştişê Nebî Îlhan û Hepisnaneyê Tîpa T yê Burhanîyeyî de xokiştişê hepsa nêweş Nurcan Bakir û pare kerd ke hepisxaneyan de bi lezî şert o ke persgirêkê hepsîyê nêweş bêro çarekerdiş.
JINNEWS/STENBOL