Roje çin a ke zîndananê Kurdistan û Tirkîya de xeberê zext, îşkence û neheqîya heqan nêrî. Nînan ra yewe zî Berîvan Bayindira ke mamostaya astengdaran a û Zîndanê Bayburtî de manena ya. Gurçikê Bayindire qîmê aye nêkenî û lazim o amelîyat biba.
Bayindire seba amelîyatî 3 reyan muracatê îdareyê zindanî kerda, labelê heta nika aye rê çîyêk nêameyo vatiş. Tewr peynî seba ke Bayindire bi hawayo kelepçe tedawî qebul nêkerda, tedawîya aye nîme de veradîyaya û tepîya erşawîyaya zîndan.
Babete ser o dayîka Bayindire Meryem Bayindire qisey kerde. Dayîke va ‘kênaya mi 6 aşmî verê Zîndanê Mêrdînî ra surginê Bayburtî bîye û dima ra pêvînayîşê ci bî 2 aşman ra reyêk’ û wina dewam kerde: “Ganî kênaya mi 10 deqayan de reyêk awe bişima û hereket bikera. Nika se ra 80 gurçikê kênaya mi nêxebetîyenî, kîs û kerrayî gurçikê aye de estî. Kênaya mi nêşîna spor bikera.”
Doktor vano çin a
Dayîke dewamê qiseykerdişê xo de va ‘doktorî îdîa kenî ke kênaya mi de kerra çin a û cok ra lazimî bi tedawî nêvînenî’ û wina domnaye: “Kênaya mi muayene nêkenî û aye ra vanî ‘ti zuran kena, to de kerrayî çin î’. Eke kênaya mi nêameyêne tewqîfkerdiş, xora ma do aye amelîyat bikerdênê. Eke kênaya mi amelîyat nêbo, do kîs biteqîyo û gurçikê kênaya mi heme birizno. Mi muracatê heme ca kerd. Eke lazim bibo ma do muracatê AÎHMî zî bikerî.”
ŞÛJIN / MÊRDÎN