Hemsereka Kongreya Komelê Demokratîke û Parlamentera HDPyî ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî şermizar bikero, 8ê teşrîna peyêne ra nata grevê vêşanîye de ya. Çalakîya Guvene rê her ke şono hîna zaf destekî yenî.
Hepsîyê cinîyî ke Zîndanê Kandira de manenî, mesajêk erşawit û dîyar kerdî ke ê wayîrê çalakîya Guvene vejîyenî. Hepsîyan dîyar kerd ke waştişê Guvene waştişê înan o zî û wina domnayo: “Embaza ma Leyla Guvene 8ê teşrîna peyêne de vera tecrîdî de dest bi grevî kerdo. Tecrîdo ke Birêz Ocalanî ser o esto, şîddetê camêrdan ra qerfîyaye nîyo. Îttîfaqê AKP û MHPyî bêxera hesir û dejan nêşêno çîyêk bido şaranê Tirkîya. Cinîyan hertim vera nê îttîfaqî de xover dayo û sere wedarnayo.”
Cinîyan dayo zanayene ke Guvene hertim bîya pawitoxê aştîye û wina dewam kerdo: “Guvena ke emrê xo seba têkoşînê azadîye feda kerdo, vera tecrîdî de qerarê grevî girewto. Ma hepsîyê cinîyî yê Zîndanê Kandira xoverdayîşê Guvene silam kenî û wayîrê xoverdayîşê aye vejîyenî. O ke peynîya tecrîdî bîyaro xoverdayîşê cinîyan o. Ganî berê Îmrali abî û tecrîd bêro wedarnayene.”
JINNEWS / ANQARA