Hemserekê DBPê Amedî vatî ke qanûnêkî vejîyeno ganî çarçiweya xo heme hepsîyan biga, wazenê hepsê sîyasî teberê nê qanûnî vera bidê, ê bi tesilî no nêzdîbîyayiş qebul nêkenê û dîyar kerdî ke heme hepsîyan ra azadî û seyyewbînanîye.     LÊL AMED AMED Sere de Emerîqa, Îtalya, Spanya, Almanya, Îran, Çîn, Fransa û pêroyina Dinya de vilabîyayişê Vîrûsê Koronayî domyeno. Pêoyina Dinya de nêzdî 500 hezar kesî bi Vîrusê ‎Koronayî kewtê. nêzdî 20 hezar kesî zî merdê. Îran vera vilabîyayişê Vîrûsê Koronayî pêroyina hepisxaneyan de bêcîyakerde heme hepsîyan serbest verada la Tirkîya de Hukimata AKP û MHPî hetanî nika seba hepisxaneyan gamêk nêeşta. Nika qanûnêkî vejenê la hepsîyê sîyasî teberê nê qanûnî veradayê, pêroyina Tirkîya de no qanûnî ra bertek ame nîşandayiş. Hemserekê DBPê Amedî Seval Gulmez û Mehmet Bakir zî bertekê xo nîşan dayê û babete ser o qise kerdê. Hemsereka DBPê Amedî Seval Gulmez vat ke pêroyina Dinya û Tirkîya de Vîrûsê Koronayî bi lezî vila bena, nika welatijan çarçiweya tedbîran nêvejîyenê teber û destanê xo şiwenê, ê zî seba hetkarîya extîyarê şarê xo xebat kenê û bal ant hepisxaneyan de vilabîyayişê Vîrûsê Koronayî û wina vat: “Çi heyfo ke hepisxaneyan de vilanêbîyayişê Vîrûsê Koronayî ser o qet tedbîran nêameyê girewtiş, no ser o zî bi hezaran hepsî binê telukeyê Vîrûsê Koronayî de yê. Seba ke agahîyê raşt nînê, no ser zî hem ma hem zî malbatê hepsîyan qerqîzyenê. Ganî heme hepsîyan bêrê serbestveradayiş, na babete de ganî heme sazîyê dewlete wezîfeyê xo bîyarê cayê xo.” Ma qeyuman qebul nekenê Gulmez tayînkerdişê qeyuman zî şermezar kerd û wina domna: “Nê rojê zehmetî de îradeyê şarî xespkerdiş, dijî bîyayişê dewleta demokratîk û huquqî yo. No zî nîno qebulkerdiş, ma xespkerdişê îradeya Şarê Kurd qebul nêkenê û ma do qebul nêkerê zî. Qet qeyuman nînê qebulkerdiş. Vera Kurdan kerdişê nê polîtîkayan nîşaneya zîhnîyetê înan o, çi heyfo ke nê rojê zehmetî de welatijan derdê weşîya xo de yê la derdê kesê bîn zî cîya yo. Ma nêzdîbîyayişê înan şermezar kenê û qeyuman zî qebul nêkenê.” Dişmenîya Kurdan kenê Hemserekê DBPê Mehmet Bakir zî aşkera kerd ke ganî vera vilabîyayişê Vîrûsê Koronayî welatijan xo bipawê, no ser zî ganî keyeyanê xo ra nêvejê û pankîya xo ra zî baldar bibê. Bakir bal ant tayînê qeyuman ra û wina dewam kerd: “Hukimata AKP û MHPî na nêweşî xo ra sey firsat dîyê û qeyuman tayîn kerdê şaredarîyê HDPî. Ma bi tesilî qebul nêkenê, vera Vîrûsê Koronayî heme dewletan yewbînan ra hetkarî danê la belê Hukimata AKP û MHPî dişmenîya Kurdan kenê. Vera Vîrûsê Koronayî tewro weş şaredarîyê ma xebat kerdinê û nê xebatê înan zî ma pîroz kenê. Ma qet qebul nêkenê û destê ma ra çi bêrê zî do ma bikê.” Bakir destnîşan kerd ke nika hepisxaneyê Tirkîya de bi sehezaran merdim estê, nêeşkenê xo û weşîya xo bipawê, nêeşkenê pankîya xo bikê û wina qedîna: “Qanûnêkî vejîyeno ganî çarçiweya xo ra heme hepsîyan biga la wazenê hepsîyê sîyasî teberê nê qanûnî vera bidê, ma bi tesilî no nêzdîbîyayiş qebul nêkenê. Heme hepsîyan seyyewbînan ê, ma vanî ke heme hepsîyan ra azadî, seyyewbînanîye, qanuno seyyewbînanîye wa pê bêro.”