AHMET KANBAL/MA/ÎZMÎR
Zîndananê Tirkîya û Kurdistanî de zext, îşkence û zulm kemî nêbenî. Heto bîn ra nê demanê peyênan de hepsîyê ke zîndanan de yî sey hêzê karî yo ercan zî yenî xebetnayîş. Çarçewaya Wezîrîya Edaletî de zîndanan de yurdê karî yenî awankerdiş û nê yurdan de hepsîyî bi nameyê ‘musnayîşê meslekî’ de sey kole yenî xebetnayîş.
Babete ser o Parlamenterê CHPyî yê Îzmîrî Atîlla Sertelî qisey kerd.
Sertelî va ‘nê yurdê karî keda merdiman dagîr kenî’ û wina dewam kerd: “Hepsîyî bi hawayo zorî yenî xebetnayîş. Nê kesî bi pereyêko kemî yenî xebetnayîş û sîgorta û teqawitbîyayîşê înan çin o. Serra 2010î ra pey qanûn ame vetiş û ê qanûnî ra pey êdî fîrmayê taybetî zî eşkenî nê yurdan de atolya biakerî. Herçiqas ke dezgeyê bedilîyayî, labelê pereyo ke dîyeno mehkûman, nêbedilîyeno.”
Zîndanî bîyî cayê dagîrkerî
Sertelî peynîya qiseykerdişê xo de wina va: “Nê yurdê karî pişta hepsîyan ra pereyêko gird qezenç kenî. Nê pereyî herinda ke seba hepsîyan bêrî xebetnayîş, seba viraştişê zîndananê neweyan yenî xerçkerdiş. Çimkî ma ewro îqtîdaro ke bi viraştişê zîndananê neweyan pesnê xo dano reyde rî bi rî yî.”