Zîndanê Tîpa Tyî yê Tarsusî ke bi zext, îşkence û tedayan her tim rojeve de yo, na rey zî bi întîxarêkî ame rojeve.
Babete ser o Waya Rojnameger Erdogan Alayumatî Sumeyye Alayumata ke şîyî pêvînayîşê birayê xo, qisey kerde û bale ante zext û tedayanê zîndanî ser.
Sumeyye Alayumate va ‘roja ke birayê mi dekewto zîndan ra nata tim qala îşkence, zext û tedayan keno’ û wina dewam kerde: “Îşkenceyî her ke şono zêde benîy û gardîyanî hepsîyan ra wazenîy ke wa payan ser de hûmara xo bidîy. Hepsîyê ke nêyî qebul nêkenî, raştê îşkence û derbkerdişî yenî û erzîyenî hucreyan. Reyna seba ke xebatkarê rojnameyê Ozgurlukçu Demokrasî Serkan Erdogan vera gardîyanan de werişto, erzîyayo odeyo sîngerin. Goreyê vatişê birayê mi heta nika 13 hepsîyî bi hawayo kêfî hucreyan de yenî tepiştiş û çîyêk nêdîyeno hepsîyan. Reyna birayê mi dîyar kerdbî ke îşkence û tedayî tena hepsîyanê sîyasîyan nê, vera edlîyan de zî yenî kerdiş. Demo peyên de hepsîyêkî zîndan de întîxar kerdo û ganî heyetêko xoser zîndanî zîyaret bikero.”
ANF/MÊRSÎN