Hepsîyê ke Zîndanê Tîpa Tyî ya Osmanîye de manenî, bi rayîrê keyeyê xo qala zext û îşkenceyî kerdî. Hepsîyê ke mehkeme de qala îşkenceyî kerdbî, wexto ke agêrayî zîndan, dîyî ke zext û îşkence vejîyayî 2 qatê verê cu. Keyeyî dîyar kerdî ke ê cuya domananê xo ver etirîyenî, wa raya pêroyî de hesasîyet bivirazîyo.
Zîndananê Kurdistan û Tirkîya de zext û neheqîyî vejîyayî dûştêko tewr berz. Bitaybetî îlanbîyayîşê OHALî ra dima sîstemê cila tek tîpe zî tede hewl dîyeno hepsîyî zîndanan de bêrî teslîm girewtene. Cok ra dûştê îşkenceyî vejîyayo nuqtayêka berze.
Nê zîndanan ra yewe zî Zîndanê Tîpa Tyî yê Osmanîye yo. Doza Nisêbînî ke 17ê ci domanî pêro pîya 70 kesî tede yenî mehkeme kerdene, taloqê aşma teşrîna verêne bîye. Hepsîyan mehkemeya peyêne de dîyar kerdbî ke ê do heta ke şertê zîndanî raşt nêbî, pawitiş nêkerî. Wexto ke hepsîyî mehkeme ra agêrayî zîndan, dîyî ke zextî hîna zêde bîyî. Hepsîyan bi rayîrê keyeyê xo, qala neheqîyan kerdî.
Dayîka Abdulkadîr Baybarsî Resmîye Baybarse dîyar kerde ke lajê aye gêrayo û dîyar kerdo ke yew aşme yo ke hucre de yo û wina domnaye: “Goreyê vatişê lajê mi, ê bi hawayo grûbê ke 20 kesan ra pê yenî, ameyî derb kerdene. Wazenî domananê ma bikişî. Çi wazenî domananê ma ra? Homa zano hîna çîyê ke ma nêzanî zî kenî bi domananê ma. Tena înan rê nê, îşkenceyê bi ma zî kenî. Hepsîyê bînî dîyar kerdî ke vengê îşkencedîyayîşê lajê mi eşnawitî. Ma do înan ewja de tena nêverdî û ma do muracatê Komeleya Heqê Merdiman (ÎHD) bikerî.”
Roje de hîrê reyan derb kenî
Dayîka Sîraç Yuksekî Emşa Yukseke zî wina va: “Rewşa hepsîyanê bînan çi bo, yê lajê mi zî wina ya. Verê cu heme eynî koguş de bî, labelê dima ra cîya kerdî. Nika îşkenceyê înan kenî. Ê nêşênî telefon de daxî qala îşkenceyî kenî. Ganî ma înan îşkenceyî ra bixelisnî. Roje de 3 reyan înan derb kenî. Çi heqê gardîyanan esto ke îşkenceyê înan kenî. Ê îşkenceyê înan kenî û înan nêbenî nêweşxane.”
Her roje bi vengê qîrayîşî hişyar benî
Dayîka Faruk Engînî Şukrîye Engîne zî daye zanayene ke lajê aye sêne û hem zî linganê xo ra birîndar o û wina va: “Labelê tedawîya ci nîna kerdene. Werd zî nêdîyeno înan. Domanê ma çîyêk nêkerdî, destê înan de ti delîl çin o û 2 serrî yo lajê mi zîndan de yo. Wa seba domananê ma tayê çîyan bikerî. Hem doman û hem zî ma îşkence vînenî. Çira hende zulmê înan kenî? Ma qebul bikerî zî ganî qanûnî qebul nêkerî. Lajê mi ewro vatêne ‘îşkenceyê embazanê mi kenî, la ez nêşena çîyêk bikera’. Ê her roje bi vengê îşkenceyî hişyar benî. Wa seba înan bikewî dewre û wa domananê ma bîyarî tîya.”
Keyeyan seba ke hesasîyet bêro awan kerdene, veng dayî herkesî û keyeyan dîyar kerd ke ê do muracatê ÎHDyî bikerî. JINNEWS/MERDÎN
