Bi nameyê Siddik Gulerî de hepsîyo 80 serrî ke serra 1994î ra nata zîndan de yo, nêweş o û nêweşîyan ver êdî nêşêno rayîr ra şêro. Lajê ci Habîb Guler zî sewbîna yew zîndan de yo û seba ke pîyê xo ra biewnîyo herçiqas ke hende muracatî kerdî zî, muracatê înan ameyî redkerdene. Siddik Guler nika Zîndanê Îskenderûnî de yo û keyeyê Gulerî heta nika sere de Komeleya Heqê Merdiman û Komeleya Piştîdayîşê Keyeyanê Hepsîyan muracatê xeylê dezgehan dayo. Kênaya ci Ayşe Gulere dîyar kerde ke rewşa pîyê aye her ke şono hîna beno xirab û îdareyê zîndanî zî hesasîyet nîşan nêdano. Gulere daye zanayene ke pîyê aye nêşêno xo ra biewnîyo û wina domnaye: “No problem çend serrî verê dest pêkerd. Pîyê min û birayê min 2 serrî pîya Zîndanê Amedî de mendî. Birayê mi o wext hetkarîya pîyê mi kerdêne. Dima ra îdareyê zîndanî her dîyan surgunê zîndananê cîya-cîyayan kerd. Pîyê mi êdî nêşêno rayîr ra şêro. Pîyê mi nêberdo nêweşxane. Pîyê mi ganî biberdêne nêweşxane.” Şertê zîndanî zaf zehmetin î  Gulere dewamê qiseykerdişê xo de va ‘pîyê mi de nêweşîyê sey tansîyono berz û qelbî estî’ û wina qedênaye: “Pîyê mi 2 reyî zîndan de anjîyo bi. Reyna pîyê mi de nêweşîya romatîzma zî esta û na nêweşîye ver nêşêno rayîr ra şêro. Pîyê mi seba ke Îskenderûn de rûtûbet esto, nêşêno rakewo. Cilê herêmî ke mi erşawîtî pîyê xo rê, nêdîyayî ci. Awe yena birnayene, kitab, kovare û radyo nêdîyenî înan. Ganî heme hepsîyî serbest bêrî veradayene.”  MA / AMED