Komeleya Heqê Merdiman û Weqfa Heqanê Merdiman yê tirkiye, bi wesîleyê 10ê Kanûne, Roja Heqê Merdiman, rapora 2015î yê binlingkerdişê heqan aşkere kerd. Bîlançoyê binlingkerdişê heqan yê 2015î zaf giran o.
Herb ra piya qetlîamî bî jêde
ÎHD û TÎHV bi munasebetê 10-17ê Kanûne Hefteyê Heqê Merdiman de rapor kerd hadre. Rapora ke hetê Serokê ÎHD Ozturk Turkdogan amê wendin de hayr anciya qedînayişê demê çarekerdin û qetlîamanê Amed, Pirsûs û Enqera ser. Herzewbîn vajiya ke, serra 2015î de biyayişê giran yê heqê merdiman amey cuwyayen. Rapor de vajiya ke, bi qedînayişê demê çarekerdin, verniya binlingkerdişê heqanê merdiman zî abiya. Rapor de vajiya ke, bi destcikerdinê demê pirodayişan ra piya, heqê cuwyan zî yeno îxlal kerdin. Sûk û mehle girotiyenê bin ablûqa. Genc, cenî, doman, kal û pîrî yenê kişten. Rapor de hayr anciya zext û îxlalanê verra çapemenî ser zî. Babeta penaberan zî rapor de ca girot.
Ozturk Turkdogan’î vistvîrî ke binlinkerdişê heqan yê ke mavêna 1’ê Çile û 5ê Kanûne de qewimiyay netîceyê ‘Qanûna Tîvariyê Zerrî’ de bî.
Bîlanço zaf giran o Îstatîstîkê ke rapor de ca girotî:
173 kesî hetê qûwetanê dewlet, bi sedemanê kêfî amey kişten, 226 kesî zî bî dirbetin. Herzewbîn 135 biyayişê merdiş û 191 zî biyayişê dirbetinî rî day.
Qetlîamê Amed de 5, yê Pirsûs de 33, yê Enqera de 100 kesan, pêro piya 138 kesan weşiya xo kerdî vinî. Nê hîrêyîn qetlîaman de 929 kesî bî dirbetin.
Wa girotxaneyê Îmrali bîro giroten
Damûstayin de hayr anciya herb û pirodayişan ser û ame vaten ke, merdişî netîceyê demê herbî de benê. Rapor de ame pêşniyaz kerden ke, herkes goreyê ‘Mutabeqatê Dolmabaxçe’ hereket bikero, girotxaneyê Îmrali bîro giroten û tecrîdê verra Abdullah Ocalan hewadiyo. Herzewbîn vajiya ke, gune polîtîkayanê antî-kurd, antî-şiî ra fek viradiyo, kantonê Rojawa bîrê silasnayen. Turkdogan’î aşkere kerd ke, heta ke haşitî nêbo, heqê însanan nîna pawiten û waşt ke, herb û pirodayişî biqediyê.
Rîwalê pirodayişan 523 kesan weşiya xo kerdî vinî
* 4 kesan binçiman de weşiya xo kerd vinî.
* 19 kesî netîceyê cînayetê kiştox nêdiyar de weşiya xo kerdî vinî.
* 28 kesan girotxaneyan de weşiya xo kerdî vinî.
* 33 kesê ke eskeriya bi zorî kerdî, bi şik û giman merdî.
* Netîceyê teqînayişê bombeyan de 5 kes merdî, 22 kesî zî bî dirbetin.
* Rîwale pirodayişan 523 esker, polîs, qoricî, sivîl û şervanan weşiya xo kerd vinî.
* 11 menganê 2015î de, netîceyê şîdetê camêrdan de, 282 ceniyan weşiya xo kerd vinî. 367 cenî bî dirbetin. 132 cenî raştê tacîz û tecawiz amey.
* 4 kesan netîceyê êrişanê nîjadperwerî de weşiya xo kerdî vinî.
* 1593 gurekaran netîceyê qeza-cînayetanê kar de weşiya xo kerdî vinî.
* 16 penaberan rayê ravêrdin de weşiya xo kerdî vinî, 160ê ci zî bî dirbetin.
* 6744 kesî amey binçimkerdin, nînan ra 1285 kesî tepişyay.
* 1433 kesî binçiman de raştê îşkence amey.
* 105 hezar û 958 sîteyê înternet, resnayin rê amey birnayen.
* Serra 2015î de verra HDP 417 êrişî viraziyay.