Herbê hîrêyîn yê dinya bi komplo û konseptê 15’ê Sibat de, şexs dê Rayver Öcalan’î de rojhelatêmiyanî de destpa kerd. Na roj serva-qandê Kurdan roja qirkerdina netewî ya. Komployê mavên-dewletî projeyê Emerîqa, Îngilîstan, Îsraîl û dewletanê serdest yê Awrûpa bi. Cok ra serokwezîrê o wextî yê Tirkiye Ecevit’î va; “Apo çima teslîmê ma kerdî, ma fehm nêkerd.” Koalîsyonê qûwetanê serdest waştî ke bi no Komployî zey herbê Filîstîn-Îsraîl, mavêna Tirkan û Kurdan de startê herbê do bê peynî bidê. Hereketê Serbestî yê Kurd û felsefeyê ci serva proje û midaxaleyê xo zey taloke vînay. Rayverê Şarê Kurd Öcalan’î no kayê tarî û planê qilerîn û talokeyî dî û pûç vet. Rayver Öcalan’î eksê xeyal û pawitenê komplogeran stratejî rona û startê herbî nêda, projeyê piyaciwyayin vist dewre.
Komployê 15’ê Sibat tenya verra Kurdan nê, verra şaranê Tirkiye, vera demokrasî, vera heqanê merdimî viraziya. No komplo tenya şerm nê, sucê do girdiyo. Roj do bîro dewlet, qûwet û rêxistinê îstixbarat yê ke no komplo miyan de serva menfaatanê xo yê polîtîk û ekonomîk ca girotî dê bîrê mahkeme kerdin. Gerek neyra tepya şarê Kurd waştena nay bikero û hetê hiqûqî bikewo hewldanan miyan.
Ser no komployê qilerîn ra 16 serrî ravêrdî. Tarixî Öcalan’î û dawaya serbestî yê Kurdan heqdar vet. Xoverdayiş û serkewtişê Kobanê, modelê xosereyê demokratîk yê Rojawa Öcalan’î heqdar vet. Roja nikayî de meseleya Kurd zey babeda sifte rojdema dinya de ca gêna. Dewletê ke Komplo miyan de ca girotî, nika çormeyê Kurdan de geyrenê û wazenê înan ra jû îtifaq virazê.
Rayver Öcalan’î girotxaneyê Îmrali ke komplogeran zey jew mezel kerdbî hadre açarna zey jû akademî. 16 serriyo Öcalan’î no akademî de rixmê şert û mercanê zehmet û tecrîdê giranî de serreyê xo teqîna, fikir û felsefeyê ciwyana newî, projeyê çarekerdina demokratîk rona. Bin ay Öcalan’î him çarekerdina meseleya Kurd ard rojdem, him zî serva ceniyan, Kurdan û pêrokîn şaran modelê ciwyana azad rona. Endî şarê Kurd ra piya dost û dişmenê ci zî îkna bî ke mûxetabê çarekerdinê meseleya Kurd Öcalan’o. Nayî ra Şarê Kurd ra piya akademîsyen, siyasetmedar, niştox, roşnbîrê namedar yê dinya waştena serbestiya Öcalan’î kenê.
Verriya 16 Serra, wextê ramitişê Komployî de brêz Öcalan zey ‘keso ke nîno waşten’ amebi îlankerdin. Nika zî Öcalan pêrokîn meseleyanê dinya ra beno roşnî. Felsefeyê Öcalan’î pêrokîn tarîyê ke kuf girotiyê roşn keno. Keyeyê ke fikrê Öcalan’î kewnê zerre de vilikî abenê, boya serbestî yena. Nika Kurdistan bi felsefeyê Rayver Apo açarniya zey gulîstan. Şar serva ronayişê sîstemê xo yê alternatîf û demokratîk seferber biyo.
Endî Kurdistan de bi Rayverîna Öcalan’î de kêberê mîladê newî, kêberê heqîqet abiya. Endî kes nêşeno no kêberî bigîro, ya zî verniya ci de bibo manî. Endî wextê Kurdê kole, xîzmetkar, nêzan, bêziwan, bêwelat qediya. Se serra 21. se serra Kurdan û yê Şaranê bindestan a. Na zî bi rayverîna û roştiyîna Öcalan’î de bena. Nayî ra “Bê Öcalan’î ciwyan, çarekerdin û serbestî nêbena” Nika gama peynî mend, a zî serbestiya Rayver Apo ya. Şarê Kurd deyndarê Rayverê xo yê, na yî ra serva ke 2015’î bikerê serra serbestiya rayverê xo gune seferber bibê.