Almanya ser payan a
Sûkanê Almanya de nûmayişê protestoyî yê Kurdistanijan ramenê. Paytexta Almanya Berlîn de gencanê Kurd nûmayişê grevê veyşanî viraşt. Nûmayiş bi jû şiyayiş qediya. Nûmayişkaran sozê berzkerdişê tekoşîn day û sloganê ‘Kiştox AKP, kiştox Erdogan’ berz kerdî.
Partiyanê Alman zî paşt day
Sûka Almanya Mannheîm de hetê hereketê ceniyan û gencan di rojî xêm roniya. Nûmayiş de hayr anciya qetlîamanê dewleta Tirk yê vera Kurdan ser. Nûmayiş roja Poncşem, seatanê şan de qediya. Munster de zî bi desan Kurdistanijî ser vengdayişê Merkezê Civaka Kurd are bî û êrişê dewleta Tirk yê vera Cizîr û Sûr protesto kerdî. Temsîlkarê Partiya Kiho (Dîe Grune) û yê Partiya Çep zî paşt day Kurdistanijan. Qiseyan de vengê nûmayiş ame dayen.
Wehşeta AKP teşîr bî
Hollanda de zî Kurdistanijî meydanan de yê. Sûka Hollanda Amsterdam de xêm roniya û derheqê biyayişan de enformasyon amey dayen. Herzewbîn herbê qilêrîn yê dewleta Tirk ame teşîr kerdin. Qiseyan de pêrokîn çormeyanê azadîwaşt ra waziya ke vera zilm vengê xo berz bikerê.
Basel ra heta Montpellîer...
Sûka Swîsre Basel de zî Kurdistanijan destpa nûmayişê grevê veyşanî yê 3 rojan kerd. Kurdistanijan Meydanê Claraplatz de xêm rona û destpa nûmayiş kerdî. Nûmayişkaran qûwetanê mavên netewî ra waştî ke vera wehşeta ser Kurdistan bikewê hereket. Sûka Fransa Montpellîer de zî vizêr nûmayişê grevê veyşanî destpa kerd. Nûmayişo ke meydanê Comedîe de viraziyeno bi desan kest tewr bî. Nûmayiş de eleqe anciya qetlîamanê sivîl ser û vera hikûmeta AKP nêrazîbiyen damusniyay.
‘Kiştoxê domanan Erdogan’
Paytexta Swêd Stockholm de Kurdistanijan bi jû nûmayiş êrişanê dewleta Tirk protesto kerdî. Nûmayişkaran fekê xo bi bantê siya girotî û bêvengiya Jûbiyena Awrûpa û hikûmeta Swêd protesto kerdî. Nûmayişkarê ke kuçeyê Drottningatan de are bî sloganê zey ‘kiştoxê domanan Erdogan’ berz kerdî, fotografê wehşetê dewleta Tirk hewaday û vilavokî kerdî vila. Roja ewro zî sûk de, meydanê Sergel de nûmayişê protestoyî viraziyeno.
Bi Parlamentoyê Kibris pêdiyayin
Paytexta Kibris Nîcosîa de zî Kurdistanijan vera Parlamento şiyayiş viraştî. Nûmayişa ke hetê PYD viraziya de hayr anciya qirkerdinê ke dewleta Tirk Kurdistan de virazena ser. Nûmayişkaran ra jew heyetî bi sermiyananê Parlamento pêdiyayiş viraşt û dosye da ci.
Adigey ra nêrazîbiyen
Komara Adigey ya xoser de zî vera êrişan nêrazîbiyen ame. Kurdistanijê Adigey bi jû eşkerakerdiş faşîzma AKP protesto kerdî. Nûmayiş de vajiya ke, AKP û Erdogan Kurdan rê tenya qetlîam, înkar û îşgal rewa vîneno, vera nay haşitî û birabiyen ra behskerdiş teslîmiyet o.
Ekvator: ‘Kiştox Erdogan’
Heto bîn ra, Erdogan û dewleta Tirk Amerîka ya Latîn de zî amey protesto kerdin. Reîscûmhûrê Tirkiye Erdogan ke şi ziyaretê Amerîka ya Latîn, Ekvator de raştê protestoyan ame. Erdogan paytext Qûîto de, zangehê AEN de bi slogananê ‘Kiştox welatê ma ra def bi’ ame pêşwazey kerdin. Protestoyî salonê zangehî de zî dewam kerdî. Pawitoxanê Erdogan’î mudaxaleyê nûmayişkaran kerdî û netîce de 15 kes bî dirbetin. Erdogan’î konferansê xo nîme de birna û salon terikna.
NAVENDÊ XEBERAN