Dûştê ziwan û kulturê Kurdî, hêrîşê bi meqsedê qirkerdişî yê rejîma Tirk ramenê. La vera nê hêrîşan de xoverdayîşê ziwan û kulturê Kurdî zî rameno. Hikûmeta AKP çarçoveyê “Planê Qirkerdişî” de nezdîyê 90 şaredarîyanê DBP xesp kerd. Hurendîya hemşaredaranê DBP de walî û qeymeqamanê xo zey qeyûm tayîn kerd. Nê qeyûman zî pêrokîn sazgehanê kulturî ke bin banê şaredarîyan de gureyanê xo da ramiten pada. Nê nimûneyan ra yew zî Agirî yo.
Walî Mûsa Işin ke zey qeyûm tayînê Şaredarîya Agirî bi, zey karê sifte hêrîşê sazîyanê Kurdan kerd. Nê sazîyan ra yewêr zî Merkezê Kultur ya Sema Yuce yo ke mîyan de dersê kurdî da. Qeyûm Işinî no Merkezê Kulturî hedef girot û pada. Mamosteyê kurdî yê merkezî Avşîn Aslanî zî her ca açarna cayê perwerdeyê bi kurdî.
Her çîyê bi kurdî kenê tirkî
Mamoste Avşîn Aslanî vist vîrî ke şaredarîyê şarî ameyê “dagirkerdiş” û da zonayen, ke îcraeta verên yê pêrokîn qeyûman padayîşê merkezanê perwerdehîyê bi ziwanê dayikê yê. Aslanî dîyar kerd ke qeyûmê ke yenê tayînkerdiş sifte verê xo danê kultur û hunerî û wina dewam kerd: “Tîya de zî eynî çî qewimya. Her çîyê bi kurdî hewaday. Nameyê parqan, nameyê sazîyan, hema çi bi Kurdî estbi, kenê Tirkî. Wazenê bi nayî vîr û zanayîşê ziwan û kulturê Kurdî çin bikerê.”
‘Her ca seba ma sinif a’
Aslanî vist vîrî ke bado ke Merkezê Kultur ya Sema Yuce ame padayîş perwerdeyê wendekaranê înan nîme de mendo û seba nayî wendekaran serpirodayîşê înan kerdo. Aslanî va, “Wendekarî têlewe bî û amey ma het û wina dewam kerd: “Wendekaran waştena dewamkerdişê perwerdeya ke nîme de mend ardî ziwan. Ma raştîya ziwan û kulturî her cayê cuye de esas girot. Keyeyê ma, malbatê ma, kuçe û kolanê ma, her cayê sûka ma de kultur û ziwanê ma esto. O wext ganî her cayê ciwîyayîşî seba ma bibîynê sinife. Ma bi no mantiqî hereket kerd û her ca seba ma bi sinife.”
‘Hûmara wendekaran bena vêşî
Mamoste Avşîn Aslanî ciresna ke badê wextekê kilmî înan dest pê dersdayîşî kerdo û ders dano komekê 6 kesan. Aslanî da zonayen ke pêropîya 35 wendekarê ey estê û wina va: “Seba perwerdekareke no çîyekê kêfweşî yo. Komeke par de, komeke keye de, komeke qehwexane de têlewe beno û ma dersanê xo domnenê."
Aslanî ard ziwan ke, rixmê pêrokîn bêîmkanîyan zî hûmara wendekaran vêşî bena û qiseyanê xo bi nê vatenan qedêna: “Bi padayîşê Merkezê Kulturî ma kewtî ferqê ci ke, seba dersdayîşê wendekaran hewcedarîyê baneke çin o. Eke babed ziwanê dayike bo, o wext ti bêîmkanî nêşkenê seba dersdayîşî bibê manî.”
DÎHABER/AGIRÎ