Hemsereka HDPyî ya Îzmîrî Semra Uzunoke vera operasyonanê qirkerdişê sîyasî de wina va: “Îqtîdar her ke dano dara HDPyî ro, bezreyê ke kewenî erd, zîl danî.” Parlamenterê HDPyî yê Wanî Tayyîp Temelî zî dîyar kerd ke vera tepiştişan de vindetişê şarî zelal o û va: “Eke kesêk şêro, ganî herinda ci de bi hezaran bêrî.”

Çend rojî verê netîceyê operasyonanê sîyasîyan de bi seyan kesê ke mîyanê ci de sîyasetmedar, rojnameger, endamê Dayîkê Aştîye û sewbîna estbî, ameybî tepiştene û heta nika tayê înan tewqîf bîyî. Vera tepiştiş û tewqîfbîyayîşan de hêrs û reaksîyonê kurd û hetanê demokratîkan her ke şono zêdeyêr beno.

Tena çend rojî verê nê, 9-10 aşmê 2018î de tena Herêma Ege de 802 kesî ameyî tepiştene û nînan ra 500ê ci Îzmîr de tepişîyayî. Babete ser o Hemsereka HDPyî ya bajarê Îzmîrî Semra Uzunoke qisey kerde. Uzunoke va ‘badê ke Rayberê Şarê Kurdî Abdullah Ocalan girîya binê tecrîdî, zextî zêde bîyî’ û wina domnaye: “Hukmatê AKP vilabîyayîşê HDPyî yê Tirkîya ser o hezim nêkerdo. Tepiştişî hedef nîşandayîşê Erdoganî ra dima zêde bîyî. Her vatişê Erdoganî hetê dozger, hakim û muduranê emnîyetî ra sey talîmat yeno dîyayene.”

Uzunoke dîyar kerde ke seba ke hukmat zano ke do weçînayîşê herêmî vînî bikero, hîna zêde hêrişê HDPyîyan keno û wina va: “Tirkîya de krîzê sîyasî û ekonomîke esto. Hukmat wazeno ke nê krîzî rojeve ra vejo, cok ra wina hêriş keno. Ma verê cû zî çîyê winasî cuyayî. Îqtîdar her ke dano dara HDPyî ro, bezreyê ke dare ra kewenî, zîl danî. Hukmat vano qey do nê bezreyî çin bibî, labelê wina nîyo.”

Aştîye yena tecrîd kerdene

Uzunoke qiseykerdişê xo de qala tecrîdo ke Ocalanî ser o esto zî kerde û wina va. “Aştîye yena tecrîd kerdene. Tecrîd yeno manaya vilabîyayîşê şerî. Seba derbazkerdişê nê prosesî, ganî tecrîd wedarîyo. Eke zextî dewam bikerî, ma zî do reaksîyonê xo bidomnî. Nê zext û tepiştişî nîşan danî ke peynîya îqtîdarê 17 serran yê AKPyî ameyo. Ma do cewabê nînan weçînayîşê herêmî de nîşan bidî.”

Vindetişê şarî zelal o

Parlamenterê HDPyî yê Wanî Tayyîp Temelî zî tepişîyayîşan sey hemleya weçînayîşî ya îqtîdarî nîşan da û wina va: “Vindetişê şarî zelal o. Raştîya xo de eleqeyê operasyonan bi mektûbanê îxbarî û sewbîna reyde çin o. Nê tepiştişî îzehetê Erdoganî gore yenî viraştene. Erdogan 7ê teşrîna verêne de va ‘HDP meşrû nîyo’ û dima ra operasyonî dest pêkerdî. Nê operasyonî dozanê KCKyî yê bînan manenî. Xora Erdoganî seba operasyonanê KCKyî mabênê 2009 û 2012î vatbi ‘ez dozgerê nê dozan a’. Labelê dima ra dîyar kerdbi ke nê operasyonî hetê cematî ra ameyî kerdene. Labelê nika rewşe cîya ya. O baş zano ke şaredarîyan vinî keno.”

Kesêk şono herinda  ci de bi hezaran yenî

Temelî peynîya qiseykerdişê xo de wina va: “Vera nê hêrişan de vindetişê şarî zelal o. Eke kesêk şêro, herinda ci de do bi hezaran kesî bêrî. Şar wayîrê moral û motîvasyonêko winasî yo. Cok ra ganî vera nê operasyonan de cayê ke ameyî veng kerdene, pirr bibî. Herinda kesêkî ganî bi desan kesan pirr bibo. Şar no het de qerardar o.”

 

MERKEZÊ XEBERAN