Welatê Fîlîpînan de seserra peyêne de beşêkê girdî yê daristanan werte ra wedarîya. Bi rayîrê qanûnêk wendekaran rê yeno ferzkerdene ke wa daran ronê. Fîlîpîn welatêkê başûrê rojhelatê Asya yo ke 8 hezar girawan ra yenê pê. Goreyê qanûnêkê neweyî yo ke Fîlîpîn de ameyo amadekerdene, wendekarî wendegehê verênî ra heta ûnîversîte seba ke bieşkê dîploma bigêrê, ganî daran ronê.
Qanûn çend hewteyî verê cû hetê Meclîsê Temsîlkaran ra ame qebûlkerdene ke dezgehê qanûndayîşî yê Fîlîpînî yo. Goreyê qanûnî, wendekarî seba her wendegehî mecbûr ê ke serre de tewr kêmî 10 daran bikarê. Qanûn seba ke bikewo dewre ganî hetê Senato ra zî bêro tesdîqkerdene. Parlamenter Gary Alejano ke pêşnûmeya qanûnî amade kerda, ard ziwan ke ê wazenê kulturê hemwelatijîya bi zanayîşî û berpirsîyarîya cimatî ciwanan reyde biafernê.
Fîlîpîn de her serre 12 mîlyonî wendekarî şinê wendegeho verêne, 5 mîlyonî wendekarî şinê lîse û 500 hezarî wendekarî zî şinê unîversîte. Bi saya qanûnî do serre de 175 mîlyonî darê neweyî bêrê ronayene. Fîlîpîn de seserra 20an de zêdebîyayîşê nufûsî reyde karê zîretî zî zêde bî û ney zî vernîya çinkerdişê daristanan akerd. Yeno texmînkerdene ke mîyanê serranê 1930 û 1980î de 98 hezar kîlometreçargoşe (9,8 mîlyon hektar) wareyê daristanî çin bîyî. Destpêkê seserra 20an de Fîlîpîn de se ra 70 erdê daristanin bi. Labelê no nisbet nika kewto se ra 20.
ANF / MANÎLA