ADNAN BÎLEN / MA/QERS
Sîyasetmedar, avukat û nuştox Mahmet Alinak, heqê Hemserekê Meclîsê Şarî yê Cizîrî Mehmet Tunç û birayê ey Orhan Tunçî de kitabêk bi nameyê ‘Mehmet Tunç û Bêkes’ nuştbî la no kitab sifte ame qedexekerdiş, peynî zî heqê Mahmut Alinakî de doz ame akerdiş.
Dozger Îddîanameyê xo de her paragrafê kitabî sey suc nawit. Misal yew paragraf de yeno vatiş ke hêzê dewlete seba hêrişê hadreyî kenê, vera ci zî Meclîsê Şarî yê Cizîrî stokê malzemeyê weşî û nanî kerdê. Peynî zî papolê Îdîl, Nisêbîn bi wesayîtan ameyî girewtiş û komunan awan bîyê. Hewna yew paragraf de biciwo Xoverdayişê Cizîrî yeno vatiş.
Hîtler, Saddam zî dişmenê kitaban bîyê
Peynîya îddîanameyî de dozger vato ke bi no kitabî endamê rêxistinî sey qehraman, operasyonê dewlete zî zey hareketê îşxale nîşan ameyo dayiş. Babete ser o Mahmut Alinak vat ke Hîtler, Musolîn û Saddam zî dişmenê kitaban bîyê û wina vat: “Tarîx de her tim dîktatoran fikro azad û kitaban ra dişmenîye kerdê. Çimkî nêwazenî şar raşteyan bizanî, no ser kitabê Mehmet Tunç û Bêkesî ra tersenê. Dewlete biwaştî qet gonî nêrijyaynê la nêwaşt çimkî armancê dewlete veşnayişê bajarê Kurd bî. Nika heqê kitabî de hîrê dozî akerdê.”